17.12.2025 | 17:37
ԱԺ «Հայաստան» խմբակցության երեք պատգամավոր երաշխավորություն են ներկայացրել Վարդան Ղուկասյանի խափանման միջոցը փոխելու համար
Պուտինի և Ուիթկոֆի հանդիպումն ավարտվել է
Քաղաքականություն
11.04.2025 | 23:30
Պուտինի և Ուիթկոֆի հանդիպումն ավարտվել է, հաղորդում է «Ինտերֆաքս» գործակալությունը: Այն շարունակվել է ավելի քան չորս ժամ փակ ձևաչափով՝ Սանկտ Պետերբուրգի նախագահական գրադարանի շենքում։ ՌԴ նախագահի մամուլի քարտուղար Դմիտրի Պեսկովը հնարավոր է համարել, որ դրա ավարտից հետո Վլադիմիր Պուտինը կարող է հեռախոսազրույց ունենալ Դոնալդ Թրամփի հետ:
Թրամփի հատուկ բանագնաց Սթիվեն Ուիթքոֆը Պուտինի հետ հանդիպել է արդեն երրորդ անգամ։ Հանդիպումից առաջ Պեսկովն ասել էր, որ դրա ընթացքում կքննարկվեն Ուկրաինայի կարգավորումը, Ռուսաստանի և ԱՄՆ-ի երկկողմ հարաբերությունները և դիվանագիտական ներկայացուցչությունների աշխատանքի կարգավորումը:
Միևնույն ժամանակ, ՌԴ նախագահի մամուլի քարտուղարը նախազգուշացրել էր, որ Ուիթկոֆի հերթական այցը Ռուսաստան «չի կարելի ճակատագրական անվանել», և որ Թրամփի հատուկ բանագնացի՝ Պուտինի հետ հանդիպումից առաջընթաց չի կարելի ակնկալել: Նույն օրը ավելի վաղ Ուիթկոֆը Սանկտ Պետերբուրգում հանդիպել էր ՌԴ նախագահի արտասահմանյան երկրների հետ ներդրումային և տնտեսական համագործակցության հարցերով հատուկ ներկայացուցիչ Կիրիլ Դմիտրիևի հետ:
Մինչդեռ Reuters-ը հայտնում է, որ Ուիթկոֆը Վաշինգտոնում Դմիտրիևի հետ նախորդ հանդիպումից հետո Թրամփին է փոխանցել Ուկրաինայում կարգավորման վերաբերյալ Կրեմլի պայմանը՝ Ռուսաստանը պետք է վերահսկողություն ստանա ուկրաինական չորս շրջանների նկատմամբ: Գործակալության տվյալներով՝ ԱՄՆ նախագահի աշխատակազմում բոլորը չէ, որ համաձայն են այս հարցում, մասնավորապես՝ գեներալ Քիթ Քելլոգը, որը Թրամփի կողմից ավելի վաղ նշանակվել էր ՌԴ-ի և Ուկրաինայի հարցերով հատուկ դեսպանորդ, դեմ է հանդես գալիս:
