Անթալիայում Ալիևը հանդիպել է Սիրիայի նախագահին և նրան Բաքու հրավիրել

Անթալիայում դիվանագիտական ֆորումի շրջանակում Ադրբեջանի  նախագահ Իլհամ Ալիևը հանդիպել է Սիրիայի անցումային նախագահ Ահմեդ ալ-Շարաայի հետ։ Ադրբեջանական կողմի փոխանցմամբ՝ Ալիևը գոհունակություն է հայտնել Սիրիայում տեղի ունեցած փոփոխությունների կապակցությամբ և շնորհավորել է Ահմեդ ալ-Շարաային այդ  կապակցությամբ։

Ալիևն ընդգծել է՝ «Սիրիայում փոփոխություններից հետո հնարավորինս շուտ այդ երկիր է ուղարկվել ադրբեջանական պատվիրակություն, իսկ Սիրիայում Ադրբեջանի դեսպանատունը, որը երկար ժամանակ անգործության էր մատնվել Ասադի ռեժիմի քաղաքականության պատճառով, վերսկսել է իր գործունեությունը»։ Ալիևը հայտնել է Ադրբեջանի պատրաստակամությունը՝ մասնակցելու Սիրիայի վերականգնման գործընթացին, որն անհրաժեշտ է այդ երկրում կայունության ամրապնդման համար։

Ահմեդ Ալ-Շաարան իր հերթին երախտագիտություն է հայտնել  ադրբեջանական կողմի աջակցության համար: Նա նշել է ապագայում Սիրիային Ադրբեջանի աջակցության կարևորությունն էներգետիկայի, ենթակառուցվածքների և անվտանգության ոլորտներում։ Շաարան նաև ասել է, թե անում է ամեն ինչ՝ Սիրիայում կայունությունը վերականգնելու համար, մտահոգություն է հայտնել այդ հարցի վրա արտաքին գործոնների ազդեցության վերաբերյալ։

Զրույցի ընթացքում բարձրացվել է նաև Ադրբեջան-Սիրիա-Թուրքիա եռակողմ համագործակցության ձևաչափի զարգացման հարցը։

Հանդիպմանը պայմանավորվածություն է ձեռք բերվել երկու երկրների բարձրաստիճան պաշտոնական պատվիրակությունների և գործարար շրջանակների ներկայացուցիչների փոխադարձ այցելությունների վերաբերյալ։

Ալիևն Ահմեդ Ալ-Շարային հրավիրել է այցելել Ադրբեջան։ Հաղորդվում է, որ հրավերն ընդունվել է։

Թարգմանությունը՝ Էմմա Չոբանյանի