Ալիևը հայտարարել է, թե Հայաստանը պիտի հրաժարվի «Թուրքիայի և Ադրբեջանի նկատմամբ տարածքային պահանջներից»

Ադրբեջանի նախագահ Իլհամ Ալիևն այսօր Բաքվում հանդիպել է «Հարավային Կովկաս․ զարգացում և համագործակցություն» համաժողովի մասնակիցներին, որոնք նախօրեին Արցախի գրավյալ Շուշիում էին։

Ադրբեջանական լրատվամիջոցների փոխանցմամբ՝ Ալիևը հայտարարել է, թե «Հայաստանը պետք է հրաժարվի Ադրբեջանի և Թուրքիայի նկատմամբ տարածքային պահանջներից»։

«Հայաստանը պիտի հասկանա, որ չի կարելի տարածաշրջանում կղզու պես մեկուսացած մնալ։ Հարաբերություններ հաստատելով Ադրբեջանի հետ, միաժամանակ, հրաժարվելով Ադրբեջանի և Թուրքիայի նկատմամբ տարածքային պահանջներից, նա չպետք է խոչընդոտի եռակողմ համագործակցությանը»,- ասել է Ալիևը՝ դժգոհելով, որ Հայաստանն ավելի վաղ մերժել է «տարբեր մակարդակներով եռակողմ բանակցություններ վարելու մի քանի առաջարկներ», մասնավորապես, արտգործնախարարների, տարբեր մասնագետների, ինչպես նաև քաղաքացիական հասարակությունների ձևաչափով։

Ադրբեջանի նախագահը նաև որոշել է Հայաստանին «խորհուրդներ տալ»։

«Եթե մենք նայենք տարածաշրջանի ապագային, ապա Հայաստանի քաղաքականությունը հակասում է ցանկացած տրամաբանության՝ Հարավային Կովկասի տարածաշրջանային անվտանգության, համագործակցության և զարգացման շրջանակում։ Հայաստանը պետք է բարելավի հարաբերությունները Ադրբեջանի և Թուրքիայի հետ՝ միաժամանակ հրաժարվելով տարածքային պահանջներից»,- ասել է Ալիևը։

Նա նաև հայտարարել է, որ ակնկալում է առաջիկայում հանդիպում անցկացնել սահմանների դելիմիտացիայի հայ-ադրբեջանական համատեղ հանձնաժողովի շրջանակում։

«Ես մեկ տարուց ավելի է՝ ասում եմ, որ Հայաստանը պետք է խաղաղության պայմանագիր կնքի Ադրբեջանի հետ։ Նրանք վերջերս են հայտարարել, որ համաձայն են։ Նույնը վերաբերում է սահմանների դելիմիտացիային։ Մենք անհամբեր սպասում ենք հանձնաժողովի շրջանակում հանդիպումներին»,- ասել է Ադրբեջանի նախագահը՝ հավելելով․ «Կառավարությունն ընդունել է Ադրբեջանի առաջ քաշած հինգ հիմնարար սկզբունքները, որոնք Հայաստանի հետ խաղաղության պայմանագրի հիմք են հանդիսանալու։ Եթե ճանաչվեն հիմնարար սկզբունքներն ու կնքվի խաղաղության պայմանագիր, Կովկասում երկարատև և կայուն խաղաղություն կհաստատվի»։

Հավելենք, որ ավելի վաղ էլ Ադրբեջանի նախագահը հայտարարել էր, թե Հայաստանի և Ադրբեջանի միջև խաղաղության հնարավոր պայմանագիրը պետք է կնքվի միայն ադրբեջանական կողմի պայմաններով։

Էմմա Չոբանյան