Պուտինյան ագրեսիային այլ պատասխան չի կարող լինել․ Շոլցը՝ Կիևին ռազմական օգնություն տրամադրելու մասին

Գերմանիայի կանցլեր Օլաֆ Շոլցը Կիևին հազար միավոր հակատանկային զենք և 500 Stinger զենիթահրթիռային համալիրներ է խոստացել: Այս մասին հայտնում է ՏԱՍՍ-ը։ Մինչև Ուկրաինայի դեմ ռազմական գործողության սկսվելը Բեռլինը ռազմական գործողությունների գոտի զենք արտահանելուց հրաժարվելու քաղաքականություն էր վարում, ինչն ամրագրված է գերմանական օրենսդրությամբ:

Գերմանիայի կանցլեր Օլաֆ Շոլցը, մեկնաբանելով Կիևին զենք մատակարարելու մասին Գերմանիայի որոշումը, հայտարարել է, որ Ուկրաինայի իրավիճակի լույսի ներքո «այլ պատասխան չէր կարող լինել»:

Նրա խոսքով ՝ Ուկրաինայի դեմ ՌԴ-ի ռազմական գործողությունը «նոր իրականություն» է ստեղծել։

«Այս նոր իրողությունը նոր պատասխան է պահանջում։ Մենք այն տվեցինք։ Ինչպես գիտեք, երեկ մենք որոշում ենք կայացրել Ուկրաինային զենք մատակարարել երկրի պաշտպանության համար։ Պուտինյան ագրեսիային այլ պատասխան չի կարող լինել»,- «ՌԻԱ Նովոստի»-ի փոխանցմամբ՝ հայտարարել է նա՝ ելույթ ունենալով Բունդեսթագի արտահերթ նիստում։

Նա նշել է, որ Բեռլինի թիվ մեկ խնդիրն այժմ ռուսական ղեկավարության «կուրսի փոփոխությունն» է։ «Պատերազմն աղետ է Ուկրաինայի համար, բայց պատերազմն աղետ կլինի նաև Ռուսաստանի համար»,- հավելել է նա։

Գերմանիան նաև Նիդերլանդներին թույլ է տվել Ուկրաինա մատակարարել գերմանական արտադրության 400 միավոր հակատանկային զենք, իսկ Էստոնիային ՝ ռազմամթերք և 9 հին հաուբիցներ, որոնք ԳԴՀ-ի ժամանակներից են:

MK.ru-ի փոխանցմամբ՝ Կիևում Գերմանիայի դեսպանը վստահեցրել է Ուկրաինայի ղեկավարությանը, որ երկուշաբթի օրվանից Գերմանիան կսկսի զենք մատակարարել Ուկրաինային։

Դեսպանի խոսքերով՝ Գերմանիան հիմնովին փոխում է իր քաղաքականությունը Ռուսաստանի նկատմամբ։ Նրա խոսքով՝ Բեռլինը մտադիր է արագացնել էներգակիրների մատակարարումների մեկնարկը՝ ռուսական գազից անկախություն ապահովելու համար։

Փետրվարի 24-ին ՌԴ նախագահ Վլադիմիր Պուտինը հայտարարել է Ուկրաինայում հատուկ ռազմական գործողության մասին՝ ի պատասխան Դոնբասի հանրապետությունների ղեկավարների օգնության դիմումի։ Դրանից հետո ԱՄՆ-ը, ԵՄ-ն, Մեծ Բրիտանիան, ինչպես նաև մի շարք այլ երկրներ հայտարարել են, որ պատժամիջոցներ են սահմանում ռուս ֆիզիկական և իրավաբանական անձանց դեմ։

Գերտերությունները նոր պատժամիջոցներ են ընդունել, ըստ որոնց՝ ռուսական բանկերը կանջատվեն SWIFT համակարգից։

Ավելի վաղ ռուսական ավիաընկերությունների համար իրենց օդային տարածքն են փակել Սլովակիան, Լատվիան, Լիտվան, Ռումինիան, Չեխիան, Լեհաստանը և Կանադան։ «Ռոսավիացիան» ի պատասխան սկսել է փակել Ռուսաստանի օդային տարածքը այս երկրների ավիաընկերությունների համար։