Եթե Ադրբեջանն ահաբեկչությամբ փորձի վնասել Արցախում որևէ մեկին, դա սադրանք կլինի ՌԴ-ի դեմ․ Դավիթ Բաբայան․ ՏԵՍԱՆՅՈՒԹ

Factor TV-ի հարցազրույցն Արցախի Հանրապետության արտգործնախարար Դավիթ Բաբայանի հետ

-Պարո՛ն Բաբայան, Արցախի ԱԱԾ-ն այսօր հայտարարեց, որ ի զորու է ապահովել ոչ միայն Արցախի նախագահ Արայիկ Հարությունյանի, այլև յուրաքանչյուր քաղաքացու և Արցախ այցելածի անվտանգությունը՝ իրականացնելով լրացուցիչ միջոցառումներ։ Կարճ հիշեցնեմ՝ Ադրբեջանի Դատախազությունն է ԱՀ նախագահ Արայիկ Հարությունյանին ձերբակալելու սպառնալիք հնչեցրել, իբր՝ «Գյանջայի վրա հրթիռային հարձակման» համար։ Ինչքանո՞վ է իրական համարվում ադրբեջանական սպառնալիքը, որ փորձեն նախագահին ձերբակալել։

-Բնական է՝ մենք նման սպառնալիքներին պետք է շատ լուրջ վերաբերվենք, շա՛տ, որովհետև ի դեմս Ադրբեջանի՝ մենք ունենք երկիր, որտեղ ահաբեկչությունը պետական քաղաքականություն է։ Այդ հայտարարությունը դրա ևս մեկ ապացույցն է։ Հայատյացություն կա Ադրբեջանում, որը նացիզմի և ֆաշիզմի դրսևորում է, և այն իրականացվում է ամենաբարձր մակարդակով։ Եթե մի երկրի կառավարությունը, ղեկավարությունը հայտարարում է, որ նման ահաբեկչական քայլերի են դիմելու, սա իսկապես ցույց է տալիս, թե ում հետ գործ ունենք։ Նախագահի դեմ այս հայտարարությունը ոտնձգություն է Արցախի պետականության նկատմամբ, քանի որ նախագահն ինստիտուտ է, նաև ոտնձգություն է քաղաքացու հանդեպ, որովհետև նախագահը և քաղաքացին հավասար են՝ Արցախի Հանրապետության քաղաքացի են հանդիսանում։ Սա պետական ահաբեկչություն է մարդու և պետական ինստիտուտների դեմ։

-Այսօր պարզ դարձավ, որ Ադրբեջանը հետախուզում է հայտարարել նաև ՀՀ երկրորդ և երրորդ նախագահների նկատմամբ՝ Ռոբերտ Քոչարյանի և Սերժ Սարգսյանի։ Ադրբեջանի Զինվորական դատախազության պաշտոնյան հայտնել է, որ նրանք Ադրբեջանում մեղադրվում են «ԼՂ-ում 1988թ․ փետրվարից ադրբեջանցի և հայ ժողովուրդների միջև ազգային թշնամանք, ատելություն հրահրելու նպատակով հայազգի աշխատավորների հավաքներ կազմակերպելու, 1991 թվականի սեպտեմբերի 2-ին «Լեռնային Ղարաբաղի Հանրապետության» հռչակման, իշխանությունը Ժողովրդական պատգամավորների շրջանային խորհրդին և գործկոմին փոխանցելու մեջ»։ Ինչո՞ւ է հենց հիմա Ադրբեջանը մեղադրանքների, հետախուզումների շարք սկսում։

-Գիտեք՝ խնդիրը ժամանակի մեջ չէ։ Խնդիրն այն է, որ սա սպասելի էր։ Մենք կանխատեսում էինք նման քայլեր դեռևս 2020թ․ նոյեմբերի կեսերից՝ հենց անմիջապես պատերազմից հետո։ Դա պարզապես ահաբեկչական քաղաքականության մի ձև է, ուղղված է Արցախի, մեր ժողովրդի դեմ։ Դրանով փորձում են վախ սերմանել, որ եթե, փաստորեն, երկրի ղեկավարությունն է թիրախավորվում, և նրան փորձելու են ցանկացած ձևով վնաս հասցնել, էլ ի՞նչ խոսել հասարակ քաղաքացիների մասին։ Սա նաև նենգ հարված է Ռուսաստանին, ռուսական խաղաղապահ առաքելությանը։ Աշխարհաքաղաքական ենթատեքստ ունի, և սա մի գործընթաց է, որին պետք է լուրջ վերաբերվենք, և այստեղ նաև ներգրավված է Թուրքիան, ըստ ամենայնի, որովհետև Թուրքիան և Ադրբեջանը միասին են այդ գործողություններն իրականացնում։ Նրանք կարող են դիմել սադրանքների ոչ միայն ճանապարհի երկայնքով, այլ նաև այլ երկրներում՝ ցանկացած պաշտոնյայի և հայի նկատմամբ։ Սա պետական ահաբեկչություն է, որը պիտի երբեք աչքաթող չանենք։

-Դուք գնահատական հնչեցրիք, որ սա սպառնալիք է նաև ռուս խաղաղապահների նկատմամբ։ Ո՞րն է Ձեր գնահատականի հիմքը։ Նկատի ունեք այն, որ Արցախում խաղաղության և անվտանգության ապահովման հիմնական գործառույթն այսօր ռուս խաղաղապահների վրա է։ Որպեսզի Ադրբեջանը կատարի իր սպառնալիքը, կա՛մ պետք է ունենա խաղաղապահների համաձայնությունը, կա՛մ կոնֆլիկտի մեջ մտնի նրանց հետ։ Ինչ եք կարծում՝ ո՞ր ճանապարհով կփորձեն ադրբեջանցիները սադրանքի գնալ։

-Տարբեր եղանակներով․․․ երբ մենք խոսում ենք, որ դա սպառնալիք է նաև ՌԴ-ի դեմ, տարբեր ահաբեկչական գործողություններ անել, ինչ-որ մեկի փորձել վնասել, առանց այդ էլ կան որոշ պրովոկատորներ, որոնք փորձում են խարխլել հայ-ռուսական եղբայրությունը, հետո սկսելու են բղավել, գոռալ, որ ռուսներն են դա անում, ի վիճակի չեն ռուսները։ Հասկանալի է, չէ՞, թե ինչ թիրախների են ուզում նրանք հասնել։ Փորձելու են աշխարհաքաղաքական դիվիդենտներ շահել, այդ պատճառով մենք պետք է շատ աչալուրջ լինենք։

Հարցազրույցն ամբողջությամբ՝ տեսանյութում։

Ռոբերտ Անանյան