09.08.2026 | 19:36
Խնձորեսկում զբոսաշրջիկներ տեղափոխող մեքենան դուրս է եկել ճանապարհից
Եթե աշխարհագրական որևէ դիրքից հարձակում սկսվի մեր դեմ, մենք պատասխան հարված կհասցնենք հենց այդ վայրին․ Իրանի ռազմածովային ուժերի հրամանատար
Քաղաքականություն
29.03.2025 | 19:06
Իրանը ունակ է ցանկացած վայրում խոցել թշնամու հենակետերը ու Իրանի վրա ցանկացած հարձակում կարժանանա վճռական պատասխանի․ ասել է Իսլամական հեղափոխության պահապանների կորպուսի ռազմածովային ուժերի հրամանատար, ծովակալ Ալիռեզա Թանգսիրին․ գրում է Mehr-ը։
Նա պարզաբանել է, որ Իրանը ձգտում է խաղաղ հարաբերությունների իր հարևանների հետ՝ վստահեցնելով, որ Թեհրանը վտանգ չի ներկայացնում տարածաշրջանի այլ ազգերի համար։
«Մենք միշտ բարեկամության ձեռք ենք մեկնում տարածաշրջանի երկրներին։ Որպես մուսուլմաններ՝ մենք ոչ մի վտանգ չենք ներկայացնում մեր հարևան երկրների համար»,- ասել է նա։
Շեշտադրելով, որ Իրանը պատերազմ սկսելու մտադրություն չունի՝ Թանգսիրին ընդգծել է, որ Իրանի շահերի կամ նրա ժողովրդի վրա ցանկացած հարձակում կարժանանա վճռական պատասխանի։
«Մենք պատերազմի չենք ձգտում և չենք ցանկանում, սակայն եթե թշնամին փորձի վնասել մեր շահերը կամ հարձակվել մեր ժողովրդի վրա, նրանք պետք է իմանան, որ մենք պատասխան կտանք»։
Անդրադառնալով ԱՄՆ նախագահ Դոնալդ Թրամփի ուղերձին և սպառնալիքներին՝ Թանգսիրին նշել . «Ես չգիտեմ Թրամփի ուղերձը և չեմ մտածում այն վերլուծել։ Ես լսում եմ նրա սպառնալիքները, հետևում եմ նրա գործողություններին և պատրաստվում եմ հակազդել դրանց»։
Թանգսիրին հայտարարել է, որ Իրանը ցանկացած վայրում թշնամու բազաներին հարվածելու կարողություն ունի՝ հավելելով, որ ցանկացած վայր, որտեղից հարձակում է իրականացվում Իրանի վրա, դրա դիմաց թիրախ կդառնա։
«Մենք հնարավորություն ունենք հարվածելու թշնամու բոլոր հենակետերին, որտեղ էլ որ դրանք լինեն: Եթե ցանկացած աշխարհագրական դիրքից հարձակում սկսվի մեր դեմ, մենք պատասխան հարված կհասցնենք հենց այդ վայրին»:
«Ոչ ոք չի կարող մեզ հարվածել և փախչել: Նույնիսկ եթե մենք ստիպված լինենք նրանց հետապնդել մինչև Մեքսիկական ծոց, մենք դա կանենք»,- հավելել է նա:
Ապա Թանգսիրին հայտարարել է, որ Իրանը չի խոնարհվի ճնշումների կամ սպառնալիքների առաջ․
«Մենք թույլ չենք տա Թրամփին իր կամքը պարտադրել մեզ»։
Հիշեցնենք, որ ԱՄՆ նախագահ Դոնալդ Թրամփը զգուշացրել է Իրանին, որ եթե վերջինս շարունակի հրաժարվել Վաշինգտոնի հետ իր միջուկային ծրագրի շուրջ բանակցություններից, ապա կբախվի «շատ վատ» հետևանքների։
