29.06.2026 | 09:39
Այրված մեքենայում հայտնաբերվել է երեք քաղաքացու այրված դի․ ՃՏՊ Սուրենավանի մոտակայքում
ՀԱՊԿ-ը և ՄԱԿ-ը քննարկում են խաղաղապահ գործունեությունն ինտեգրելու եղանակները
Քաղաքականություն
09.02.2022 | 13:14
Հավաքական անվտանգության պայմանագրի կազմակերպությունը և ՄԱԿ-ը քննարկում են ՀԱՊԿ-ի և ՄԱԿ-ի խաղաղապահ գործունեությունն ինտեգրելու եղանակները: Այս մասին «ՌԻԱ Նովոստի»-ին տված հարցազրույցում ասել է Կազմակերպությունում Ռուսաստանի Դաշնության մշտական ներկայացուցիչ Միքայել Աղասանդյանը։
Ավելի վաղ ՄԱԿ-ում ՌԴ մշտական ներկայացուցիչ Վասիլի Նեբենզյան հայտնել էր, որ ՀԱՊԿ գլխավոր քարտուղար Ստանիսլավ Զասը փետրվարի 16-ին ելույթ կունենա ՄԱԿ-ի Անվտանգության խորհրդում և, ի թիվս այլ հարցերի, կխոսի Ղազախստանում իրավիճակը կայունացնելու Հավաքական անվտանգության պայմանագրի կազմակերպության ջանքերի մասին։ Ռուսաստանը փետրվարին ՄԱԿ-ի Անվտանգության խորհրդի նախագահն է։ ՀԱՊԿ-ի կազմում են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը։
Աղասանդյանի խոսքով, խաղաղապահության թեման, որը փոխգործակցության առանցքային ուղղություններից է, փետրվարի 16-ին ՄԱԿ-ի Անվտանգության խորհրդում շատ բանախոսների ուշադրության կենտրոնում է լինելու։ Ըստ նրա՝ ՀԱՊԿ-ի և ՄԱԿ-ի միջև գործնական շփումները պարբերական հիմքի վրա են դրվել 2010 թվականի մարտին նրանց քարտուղարությունների միջև համագործակցության մասին համատեղ հռչակագրի ընդունումից հետո:
«Դրա հիման վրա 2012 թվականի սեպտեմբերին ստորագրվել է փոխըմբռնման հուշագիր ՀԱՊԿ քարտուղարության և ՄԱԿ-ի քարտուղարության խաղաղապահ գործողությունների դեպարտամենտի միջև, ստեղծվել է խաղաղապահ հարցերով համատեղ աշխատանքային խումբ։ Քննարկվում են համագործակցության հեռանկարային ոլորտները, ՀԱՊԿ-ը ՄԱԿ-ի խաղաղապահ գործունեությանը ինտեգրելու եղանակները և ՀԱՊԿ կրթական կազմակերպություններում խաղաղապահ ուժերի անձնակազմի վերապատրաստման ծրագրերի հավաստագրման հարցեր»,- ասել է Աղասանդյանը։
ՀԱՊԿ-ում Ռուսաստանի մշտական ներկայացուցիչը նշել է, որ 2021 թվականի դեկտեմբերին ՄԱԿ-ի խաղաղապահ գործունեության գործնական փորձն ուսումնասիրելու նպատակով ՀԱՊԿ քարտուղարության և միացյալ շտաբի ներկայացուցիչներն այցելել են Լիբանանում ՄԱԿ-ի ժամանակավոր ուժերի տեղակայման վայրեր։
«Խաղաղապահ գործունեությունը կարգավորող նորմատիվ-իրավական դաշտը մշակվում է հենց ՀԱՊԿ ձևաչափով, ինչը, ի թիվս այլ բաների, ենթադրում է մեր կազմակերպության խաղաղապահ ուժերի օգտագործման հնարավորությունը ՄԱԿ-ի խաղաղապահ գործողություններում»,- հավելել է Աղասանդյանը։
Տաթև Ֆռանգյան
