Նախարարներին ազատելու՝ Փաշինյանի հայտարարությունը հիշեցնում է «ինչքան ուզեմ, այնքան կխփեմ»-ը. իրավապաշտպան․ ՏԵՍԱՆՅՈւԹ

Վարչապետ Նիկոլ Փաշինյանի՝ նախարարներին աշխատանքից ազատելու վերաբերյալ երեկ Ազգային ժողովում հնչեցրած միտքը հարուցել է իրավապաշտպանների մտահոգությունը։

«Պարոն Քերոբյանին ես եմ արգելել հրաժարական տալ: Ես կորոշեմ՝ յուրաքանչյուր նախարար ինչքան կաշխատի և ինչքան չի աշխատի»,- ասել էր Փաշինյանը։

Նիկոլ Փաշինյանն այս թեմային անդրադարձավ պատգամավորների հետ հարցուպատասխանի ժամանակ, երբ ընդդիմությունից հետաքրքրվեցին՝ ինչո՞ւ Վահան Քերոբյանն էկոնոմիկայի նախարարի պաշտոնից հրաժարական չի տալիս խոստացված երկնիշ տնտեսական աճը չապահովելու դեպքում:

«Կատակ եմ արել, որ ասել եմ՝ հրաժարական կտամ»,- իր հերթին ասել էր Վահան Քերոբյանը։

Երկնիշ տնտեսական աճ չապահոված Քերոբյանի կատակներն առիթ դարձան, որ Նիկոլ Փաշինյանը հայտարարություններ անի, որոնք, ըստ իրավապաշտպան Նինա Կարապետյանցի, հիշեցնում են մերժված նախկինների գործելաոճը: Իրավապաշտպանը նշում է՝ Փաշինյանի հայտարարությունն ընկալելի կլիներ, եթե շեշտեր, որ քաղաքական թիմը կորոշի՝ այս կամ այն նախարարը որքան է պաշտոնավարելու:

Նիկոլ Փաշինյանի այս հայտարարության վերաբերյալ վարչապետի աշխատակազմից պարզաբանում չեն տալիս։ Փաշինյանը, հիշեցնենք, երեք ամիս է՝ մամուլի խոսնակ չունի։ Իսկ ահա Կառավարության անդամներից ԿԳՄՍ նախարարը որևէ արտառոց բան չի տեսնում իր վերադասի հայտարարությունում։ Փաշինյանի որոշմամբ ԿԳՄՍ նախարարի պաշտոնը զբաղեցնող Վահրամ Դումանյանը իրավապաշտպանների մտահոգությունները՝ ժողովրդավարական սկզբունքներից հետընթացի մասին, տեղին չի համարում:

«Բացարձակապես՝ ոչ: Վարչապետը կարող է ցանկացած որոշում կայացնել, բայց գիտենք, որ վարչապետի ցանկացած որոշում հիմքերի վրա է»,- ասում է Դումանյանը։

Նախարարի մատնանշած հիմքերը, ըստ էության, Սահմանադրությամբ վարչապետին տրված լիազորություններն են: Սահմանադրության 150 հոդվածի համաձայն՝ վարչապետն է ՀՀ նախագահին առաջարկում նախարարների թեկնածությունները, ինչպես նաև պաշտոնանկության միջնորդություններ ներկայացնում:

«Թղթերով ամեն ինչ նորմալ է, բայց երկրի ղեկավարը, որը հայտարարում է՝ մենք ժողովրդավար ենք, գնում ենք ավելի թափանցիկության ճանապարհով, բայց երբ բարձր ամբիոններից հայտարարում է, որ ինքն է միանձնա ու միահեծան որոշում՝ ով կաշխատի, ով՝ չէ, սա խնդիր է»,- նշում է Նինա Կարապետյանցը։

Վարչապետի հայտարարությանը չի մեկնաբանում ժողովրդավարական արժեքների հաստատման համար արված հեղափոխությամբ իշխանության եկած ԱԽ քարտուղար Արմեն Գրիգորյանը՝ նշելով, որ ավելացնելու ոչինչ չունի:

Նիկոլ Փաշինյանն իր այս հայտարարությունը, նկատենք, մեծ հաշվով մի քանի տարի է՝ կյանքի է կոչում: Վարչապետը վերջին երկու տարիների ընթացքում պաշտոնանկությունների կամ պաշտոնի նշանակման տասնյակ որոշումներ է կայացրել՝ հանրությանը որևէ պարզաբանում չներկայացնելով: Factor TV-ն օրերս անդրադարձել էր շուրջ երեք տասնյակի հասնող պաշտոնակությունների, որոնց հետ կապված որևէ հիմնավորում հանրությանը չի ներկայացվել:

Մանրամասները՝ տեսանյութում։

Նարեկ Կիրակոսյան