28.02.2026 | 20:49
Հայաստանը կաջակցի ՀՀ տարածքով Կանադայի քաղաքացիների տարհանմանը
Մերձբալթյան երկրները խնդրում են ՆԱՏՕ-ին ավելացնել զորքերի թիվն իրենց տարածքներում
Քաղաքականություն
13.01.2022 | 22:52
Լատվիան, Լիտվան և Էստոնիան խնդրում են ՆԱՏՕ-ին՝ ավելացնել իրենց տարածաշրջանում տեղակայված ՆԱՏՕ-ի զորքերի թիվը և համապատասխան բանակցություններ են վարում։ Այս մասին Reuters-ին ասել է Էստոնիայի վարչապետ Կայա Կալլասը։
Նա չի նշել երկխոսության մանրամասները, բայց որպես Ռուսաստանին զսպող միջոց՝ անվանել է ՆԱՏՕ-ի լրացուցիչ ուժերի հնարավոր տեղափոխումը Բալթյան երկրներ, գրում է DW-ի ռուսական ծառայությունը։
Իր հերթին, դաշինքի դիվանագետներից մեկը, որը ցանկացել է անանուն մնալ, ասել է, որ մերձբալթյան երկրների խնդրանքը կարող է քննարկվել փետրվարի կեսերին կայանալիք ՆԱՏՕ-ի պաշտպանության նախարարների հանդիպման ժամանակ։
Վերջին ամիսներին արևմտյան և Բալթյան երկրներին սահմանակից Ռուսաստանի միջև լարվածությունը զգալիորեն աճել է։ 2021 թվականի ամռան սկզբից Ռուսաստանի Դաշնությունը մոտ 100 հազար զինծառայող է տեղափոխել բռնակցված Ղրիմ և Ուկրաինայի հետ սահման՝ բացատրելով, որ զորավարժություններ է անցկացնում։ Արևմտյան առաջնորդները մտավախություն ունեն, որ Մոսկվան պատրաստվում է պատերազմի։
Կրեմլը հերքում է ռազմական գործողության ծրագրերը և մեղադրում է արևմտյան երկրներին Ուկրաինային զինելու և Ռուսաստանի Դաշնության սահմանների մոտ զորավարժություններ անցկացնելու համար։ Բացի այդ, Ռուսաստանի իշխանությունները պահանջում են «անվտանգության երաշխիքներ», ներառյալ՝ ՆԱՏՕ-ի հրաժարումը դեպի արևելք ընդլայնվելուց և Ուկրաինային իր անդամակցություն ընդունելուց:
Տաթև Ֆռանգյան
