Էրդողանը չափազանց «թունավոր» է Ջո Բայդենի Ժողովրդավարության գագաթնաժողովի համար. թուրք փորձագետ

ԱՄՆ նախագահ Ջո Բայդենը ցանկանում է շարունակել պրագմատիկ հարաբերությունները Անկարայի հետ, սակայն Թուրքիայի նախագահ Ռեջեփ Թայիփ Էրդողանի ռեժիմը չափազանց «թունավոր» է ԱՄՆ քաղաքական սպեկտրում՝ նրան «Հանուն ժողովրդավարության» գագաթնաժողովին հրավիրելու համար։ Նման կարծիք է հայտնել Ժողովրդավարությունների պաշտպանության հիմնադրամի (FDD) Թուրքիայի ծրագրերի ավագ տնօրեն, Թուրքիայի խորհրդարանի նախկին ընդդիմադիր պատգամավոր Այքան Էրդեմիրը, գրում է «Ահվալ» գործակալությունը։

Նա նշել է, որ Բայդենի համար ամոթալի կլիներ Էրդողանի հետ միաժամանակ նկարվել, այն դեպքում, երբ Թուրքիան ակադեմիական ազատությունը, մամուլի ազատությունը, օրենքի գերակայությունն ու ժողովրդավարությունն ամենավատ ոտնահարողներից է։

Նշենք, որ «Հանուն ժողովրդավարության» գագաթնաժողովը մեկնարկել է նախօրեին՝ նախագահ Բայդենի բացման խոսքով։ Այս գագաթնաժողովը դիտարկվում է որպես Ջո Բայդենի արտաքին քաղաքականության առանցքային նախաձեռնություններից մեկը, քանի որ նա փորձում է հետ մղել ավտորիտարիզմի համաշխարհային ալիքը:

Հավելենք, որ գագաթնաժողովին հրավիրված է մասնակցելու 100-ից ավելի երկիր, որոնց թվում է նաև Հայաստանը։ Թուրքիան ու Ադրբեջանը հրավիրված չեն։

Էրդեմիրը նշել է, որ Թուրքիայի բացակայությունը գագաթնաժողովին ևս մեկ հիշեցում է ոչ միայն երկու երկրների ղեկավարների սառը հարաբերությունների, այլև Վաշինգտոնում շարունակվող երկկուսակցական կոնսենսուսի մասին, որ Թուրքիան ո՛չ գործող ժողովրդավարություն է, ո՛չ էլ մերձավոր դաշնակից, որն արժանի է նման հրավերի:

Ըստ փորձագետի՝ շատ դիտորդներ կարծում են, որ գագաթնաժողովը քիչ ազդեցություն կունենա։ Այնուամենայնիվ, ըստ նրա՝ Անկարայի համար ազդակները մնում են բացասական, անկախ նրանից՝ գագաթնաժողովը կհաջողվի՞, թե՞ ոչ։

Էմմա Չոբանյան