Քաղաքականություն
11.12.2021 | 17:02«Առաջին անգամ մենք ունենք ժողովրդի կողմից ընտրված իշխանություն. այդ է պատճառը, որ լուռ եմ: Այնպես չէ, որ գոհ եմ այն ամենից, ինչ կատարվեց 2018-ից այս կողմ: Ուզում եմ հավատալ, որ այս իշխանության վերջնանպատակն ազնիվ է. կարծում եմ՝ ժողովուրդն իրեն հենց դրա համար է ընտրել»,- Factor.am-ի հետ զրույցում նշում է երգիչ, երգահան Էդուարդ Զորիկյանը՝ պատասխանելով հարցին, թե ինչի՞ց ելնելով է ինքը, լինելով բոլոր ժամանակների իշխանություններին սուր քննադատությունների ենթարկող արվեստի գործիչ, վերջին ժամանակներում լուռ կամ համեմատաբար զուսպ իր դատողությունների և մեկնաբանությունների մեջ:
Խոսելով վերջին շրջանում Ազգային ժողովում տեղի ունեցած ծեծկռտուքների, իշխանության և ընդդիմության փոխադարձ հայհոյախառն մեղադրանքների մասին՝ երգահանը նկատում է. «Իշխանությունը չպետք է տրվի խաղի այն կանոններին, որոնք թելադրում է ընդդիմությունը, չպետք է պատասխանի հայհոյանքներին, ծեծկռտուքների մեջ չպետք է ներքաշվի, եթե, իրոք, ինքն ուրիշ է»:
Էդուարդ Զորիկյանն անդրադառնում է նաև պատերազմից հետո Հայաստանի դիրքորոշմանը։
«Ի վերջո, մենք պետք է կարողանանք ասել՝ ոչ, նույնիսկ եթե դրանից հետո «քոթակեն», հատկապես, որ արդեն իսկ մի լավ «քոթակվել ենք»: Պատերազմից հետո պետք է ոչ ասել ռազմական, տնտեսական, մշակութային այն դաշինքներին, որոնք մեզ միշտ դժբախտություն են բերել»,- ասում է նա:
Խոսելով նաև արվեստի մասին՝ երգիչը շեշտում է՝ իր ստեղծագործական կյանքի ընթացքում հասցրել է անդրադառնալ գրեթե բոլոր թեմաներին, իսկ ինչ վերաբերում է հարցին՝ արդյո՞ք Հայաստանի հանրությունն այսօր ունի արվեստի կարիք, Էդուարդ Զորիկյանը պատասխանում է. «Եթե շարունակենք թուրքի կլկլոցի տակ ամուսնանալ ու երեխա կնքել, նման վարքը բերելու է նոր պատերազմի և նոր զոհերի»:
Հարցազրույցն ամբողջությամբ՝ տեսանյութում:
Աննա Բաբաջանյան
