Քաղաքականություն
11.12.2021 | 15:02Factor TV-ի հարցազրույցը ԱՄՆ-ում ՀՀ նախկին փոխդեսպան, դիվանագետ Արմեն Խարազյանի հետ
-Պարո՛ն Խարազյան, ինչքան էլ Հայաստանը փորձի գործակցել Արևմուտքի հետ, միևնույն է՝ գտնվում ենք ՀԱՊԿ-ում, ԵՏՄ-ում, ԱՊՀ-ում, ռուսական ռազմաբազա կա այստեղ, մեր երկու պետական սահման ռուսներն են պահում, տնտեսական, էներգետիկ, ռազմական ոլորտներում ռուսական գերակայություն է։ Հայաստանը նույնիսկ Թուրքիայի հետ հարաբերություն կարգավորելուն օգնելու խնդրանքով դիմում է ՌԴ-ին։ Արդյո՞ք ՀՀ-ի միաբևեռությունը մեզ պարտադրված չէ պատմականորեն և աշխարհագրորեն։
-Ոչ՛, դատապարտված չենք, ո՞վ ասաց։ Կարելի է, իհարկե, սրա մասին շատ խոսել․ մարդն այն է, ինչ ինքը տեսնում է։ Եթե մեկը որոշում է, որ ինքը՝ որպես հայ, կարծում է՝ ՀՀ-ն պետք է դատապարտված Ռուսաստանի գաղութ լինել կամ Ռուսաստանի կցորդ, և ինքն իրեն զրկելու է ինքնապաշտպանության բնազդից, այդտեղ նրա հետ ոչինչ անել չես կարող։ Դա՞ ենք մենք ուզում՝ որպես հայկական հանրություն, թե՞ ուզում ենք ուրիշ բան․ ուզո՞ւմ ենք լինել աշխարհում 180-ից ավելի ազգերի նման պետականություն ունեցող հանրություն, թե՞ չենք ուզում։ Ուզում ենք մենք ինչ-որ ավտորիտար, էքսպանսիոնիստական, կոռումպացված երկրի կցո՞րդ լինել։ Թեև, ասեմ ձեզ, ավտորիտար, էսքսպանսիոնիստ լինելը կամ կոռուպցիան չեն միայն այն պատճառները, թե ինչու պետք է ՀՀ-ն իրեն տեսնի որևէ երկրի կցորդ։ Ժողովրդավարական երկրի կցորդ լինելն էլ ընդունելի հարցադրում չէ, եթե խոսում ենք մեր ինքնության մասին։
Դատապարտվածության հարցադրումը գրեթե անհաղթահարելի հուն է ստեղծում այստեղ։ Այսինքն՝ ինչ էլ դու անես, ասում է՝ դու դատապարտված ես այս իրականությանը, հաշտվիր սրա հետ և յոլա գնա, և իբրև երկիր, ազգ վերացիր։ Եթե սա է գերակշիռ կարծիքը ՀՀ-ում՝ ըստ Ձեր նոր առաջարկածի, ապա այստեղ ոչինչ անել չես կարող, եթե մարդը դա չի ուզում։ Ոչինչ չես կարող անել, բացի ժամանակավոր թերապիա առաջարկելուց և փորձելուց այդ անձի մեջ վերադարձնել իր անձնական արժանապատվության զգացողությունը, ինքնապաշտպանության բնազդը։
Բայց արդյո՞ք Հայաստանը հասել է այդ վիճակին, ես կարծում եմ՝ ոչ։ Թերևս այսօր շատերը Հայատսնաի իրավիճակից ելնելով՝ կարծում են՝ այդպես էլ պետք է լինի, բայց այդպես չի կարող լինել, եթե շարունակենք այդպես, մենք պարզապես որպես ժողովուրդ կվերանանք։
Հարցազրույցն ամբողջությամբ՝ տեսանյութում։
Ռոբերտ Անանյան
