Ի՞նչ եք գոռում․ Ղարաբաղը ծախողներն ասում են՝ Ղարաբաղը հանձնեցին․ Փաշինյանը բարկացավ․ ՏԵՍԱՆՅՈւԹ

Դուք հրապարակում հայտարարել էիք՝ կա՛մ ես կլինեմ Հայաստանի վարչապետ, կա՛մ Հայաստանը վարչապետ չի ունենա: ԱԺ-ում կառավարության հետ հարցուպատասխանի ժամանակ դիմելով ՀՀ վարչապետ Նիկոլ Փաշինյանին, հիշեցրեց «Հայաստան» խմբակցության պատգամավոր Ագնեսա Խամոյանը:

Պատգամավորը հարց ուղղեց Փաշինայնին. «Արդյո՞ք ուժի մեջ է այդ հայտարարությունը, թե՞ եթե ձեզ հնարավորություն ընձեռվի իրավիճակը մեղմելու համար գոնե ձեր թիմակիցներից մեկին փոխանցել վարչապետի պաշտոնը, օրինակ՝ Ալեն Սիմոնյանին, Արարատ Միրզոյանին, Սուրեն Պապիկյանին, հնարավո՞ր է անեք այդպես»:

«Ես հրաժարական մեկ անգամ տվել եմ , եթե հրաժարական չտայի, դուք էլ, Տիկին Մկրտչյանի հետ, հիմա Բաղրամյանում քյաբաբ անելիս կլինեիք, դուք իմ հրաժարականի շնորհիվ եք այստեղ, եթե հրաժարական չտայի, ամբողջ կազմով այստեղ չէիք լինի»,- ասաց Փաշինյանը:

Նիկոլ Փաշինյանը մի շարք մեղադրանքներ հնչեցրեց ընդդիմության հասցեին՝ ընդգծելով, որ ԼՂ հարցով ինքը բանակցային վատ ժառանգություն է ստացել:

«2018թ-ին ստացած բանակցային բովանդակությամբ՝ Ղարաբաղը Ադրբեջանի կազմում չգտնվելու որևէ նույնիսկ տեսական հնարավորություն չի եղել, սա ձեր իշխանությունն է բերել, եթե սա դավաճանություն է, ապա դավաճանների իշխանությունը դուք եք:

Դուք բանակը թալանել եք, երկիրը թալանել եք, ԱԹՍ-ների մասին եք խոսում, ձեր ՊՆ նախարարն էր ասում, «կանսերվի կոկոշները» կախեք դիրքերում, որ ադրբեջանցին մոտենա՝ իմանաք. ձեր խմբակցության ղեկավար հայտարարությունն է սա»,- նշեց Փաշինյանը և հավելեց՝2016թ-ի դրությամբ՝ բանակցային գործընթացում տեղի է ունեցել աղետ և Ղարաբաղը կորցրել է Ադրբեջանի կազմից դուրս լինելու գործնական և տեսական բոլոր հնարավորությունները:

«Սա ձեր իշխանության ժառանգությունն է, և սա կապացուցեմ ցանկացած տեղում»,- նշեց Փաշինյանը:

Ընդդիմադիր պատգամավորները տեղից սկսեցին աղմկել:

«Ի՞նչ եք գոռում… Ղարաբաղը ծախողներն եկել ասում են՝ Ղարաբաղը հանձնեցին․Ղարաբաղը հանձնածներն այստեղ նստած են»,- նշեց վարչապետը՝ մատնացույց անելով նախկին իշխանության ներկայացուցիչներին:

Մանրամասները՝ տեսանյութում: