ԵՐԵՎԱՆԻ ԺԱՄԱՆԱԿՈՎ. Ամենավտանգավորը «Մենք պետություն ունենալու իրավունք չունենք» մտայնությունն է, որը հարկավոր է արմատախիլ անել . Նարինե Գրիգորյան

«Շատ լավ է, որ հիմա Հայաստանում մտորումների, ինքնահարցադրումների շրջան է. դրանք կծնեն ուժեղ մարդկանց, որոնք կբերեն լավ ժամանակներ: Հեշտ ժամանակները ծնում են թույլ, իսկ ծանր ժամանակները`ուժեղ մարդկանց»,- Factor.am-ի հետ զրույցում նման տեսակետ է հայտնում Սոս Սարգսյանի անվան Համազգային թատրոնի գեղարվեստական ղեկավար, ՀՀ վաստակավոր արտիստ Նարինե Գրիգորյանը:

Նրա խոսքով` պատերազմից հետո սկզբնական շրջանում մեր հարցադրումները ինքնակործան էին, իսկ ամենավտանգավորը, որ հարկավոր է արմատախիլ անել, ըստ նրա, հանրության որոշ հատվածի մոտ առկա այն միտքն է, թե «Մենք պետություն ունենալու իրավունք չունենք».

«Նախորդ 30 տարիներին մենք տարվել էինք մեր հաղթանակով, նստել ու գռփում էինք. հիմա ենք գնահատում այն, ինչ ունեինք: Բայց ինքնախարազանմամբ զբաղվելու փոխարեն պարզապես պետք է գիտակցենք մեր սխալները և ստեղծարար լինենք, հաղթանակներ գրանցենք»:

Նարինե Գրիգորյանը հատկապես երկրի համար դժվարին պահերին հաճախ է լսում «Ո՞ւր են մտավորականները» հարցադրումը.

«Ոմանք ինձ ասում էին` դուք «կապիկություն եք անում, իսկ վաղը, որ հայրենիք չլինի, որտե՞ղ եք անելու դա»: Այսքանից հետո ինչպե՞ս միանալ մարդկանց, որոնք համարում են, որ դու «կապիկություն» ես անում: Դժվարին իրավիճակներում ամեն մեկի պայքարի ձևը տարբեր է. պայքարի իմ ձևը հանդիսատեսի հետ զրուցելն է, գոռգոռոցն ու ավել-պակաս խոսելը ոչինչ չի տալիս»:

Դերասանուհին, խոսելով մեր կորստների ու ձեռքբերումների մասին, շեշտում է` ինչպես մեծ հաղթանակն է բաղկացած փոքր հաղթանակներից, այնպես էլ մեծ պարտությունը` փոքր պարտություններից.

«Մեղավոր եմ զգում, որ, օրինակ, երբ ժամանակին Սոս Սարգսյանը զայրացած խոսում էր անորակ սերիալների մասին, չեմ պայքարել դրանց դեմ, թեպետ չեմ եղել դրանց մասնակիցը»:

Մանրամասները` տեսանյութում:

Աննա Բաբաջանյան