ՌԴ-ն մեր թշնամուն զինել է մասսայական ոչնչացման զենքերով․ նոր դաշնակիցներ պիտի ձեռք բերենք՝ ՀԱՊԿ-ը լքելով․ Դավիթ Սանասարյան․ ՏԵՍԱՆՅՈՒԹ

Factor TV-ի հարցազրույցը «Ինքնիշխան Հայաստան» կուսակցության նախագահ Դավիթ Սանասարյանի հետ

-Նիկոլ Փաշինյանը կառավարության նիստում հայտարարեց, որ ընդունում է ՌԴ-ի կողմից նոյեմբերի 17-ին Ադրբեջանին և Հայաստանին արված առաջարկները՝ դելիմիտացիայի և դեմարկացիայի վերաբերյալ: Նա նշել է, որ ՌԴ-ի կողմից երեք առաջարկ է արվել, երեքն էլ Հայաստանի համար ընդունելի են: Եթե դիտարկենք վերջին օրերին սահմանին ստեղծված իրադրությունը, ինչ է ստացվում՝ խաղաղության գինը ռուսական առաջարկների ընդունո՞ւմն էր:

-Ասացիք այն, ինչ պատրաստվում էի ասել: Առհասարակ, անընդունելի է այս ձևով գնալ սահմանազատման կամ սահմանագծման: Առավել ևս ինձ համար կասկածելի են այն գործողությունները, այն սցենարները, որ կրկնվում են, միգուցե մի քիչ կրեատիվություն մտցնեն, նոր մտքեր ունենան, թե ինչպես կարելի է կազմակերպել այդ ամեն ինչը: Ես վստահ էի, որ դա կազմակերպվում է Ռուսաստանի կողմից, կազմակերպչական դիրիժորի փայտիկները Ռուսաստանի ձեռքում են: Տեղի ունեցավ հարձակում, սպասում էինք, թե ինչն է լինելու դրա գինը, ինչի դիմաց կանգնեցվեց հարձակումը:

-Այսինքն՝ Հայաստանն այսքան ժամանակ դիմադրում էր ռուսական առաջարկներին, և ադրբեջանական զենքո՞վ պարտադրվեց:

-Կարծում եմ՝ որոշակի դիմադրություն կար: Ամեն դեպքում ես իմ տեսակետը ներկայացրել եմ Նիկոլ Փաշինյանին, որ Հայաստանը չպետք է գնա սահմանազատման և սահմանագծման հենց հիմա ու այս ձևաչափերով։ Ռուսաստան-Հայաստան-Ադրբեջան եռակողմ ձևաչափով Հայաստանը չպետք է գնա դրան, Հայաստանը նախևառաջ պետք է խնդիրները կարգավորի Ադրբեջանի հետ: Առաջին հերթին Ադրբեջանը պետք է դադարեցնի հակահայկական, հայատյաց քաղաքականությունը: Ագրեսիայի սպառնալիքի տակ Հայաստանը գնում է սահմանազատման ու սահմանագծման: Բայց նաև այդ սահմանագծումը, առանց սահմանազատման, տեղի է ունենում այս օրերին, այսինքն՝ Ադրբեջանը փորձում է քայլ առ քայլ մոտենալ իր համար ցանկալի քարտեզներին… Ես դատապարտում եմ Նիկոլ Փաշինյանի, Ալեն Սիմոնյանի և մյուս պաշտոնյաների այն հայտարարությունները, որ ադրբեջանցիներն իրենց տարածքում են անցակետեր դրել: Ո՞վ է թույլ տվել նման հայտարարություններ անել, եղե՞լ է սահմանազատում-սահմանագծում, քարտեզները ճշգրտվա՞ծ են, ո՞ր թվականի քարտեզներով են արվել: Ինչո՞ւ եք այնպիսի հայտարարություններ անում, որ հետո պետք է ազգովի կանգնենք խնդրի առաջ:

Հարցազրույցն ամբողջությամբ՝ տեսանյութում:

Ռոբերտ Անանյան