Թուրքիան համագործակցում է Իրանի հետ «3+3» ձևաչափի գործարկման համատեքստում․ Չավուշօղլու

Թուրքիան հանդես է գալիս ցանկացած միակողմանի պատժամիջոցների դեմ։ Թեհրանի նկատմամբ ԱՄՆ-ի նման սահմանափակումները պետք է չեղարկվեն։ Այս մասին Թեհրանում հայտարարել է Թուրքիայի ԱԳ նախարար Մևլութ Չավուշօղլուն իրանցի իր գործընկեր Հոսեյն Ամիր Աբդոլլահիանի հետ կայացած համատեղ մամուլի ասուլիսում, գրում է «Անադոլու» գործակալությունը։

Թուրքիայի ԱԳ նախարարը հույս է հայտնել, որ Իրանի մասնակցությամբ բանակցությունները Վիեննայում արդյունավետ կլինեն։ Չավուշօղլուն նշել է, որ Անկարան կարևոր է համարում իրանական միջուկային ծրագրի շուրջ երկխոսությունը։

Թուրք նախարարը նաև ուշադրություն է հրավիրել սիրիական խնդրի քաղաքական կարգավորման ջանքերին։
«Մեր երկրները պետք է շարունակեն նպաստել սիրիական կարգավորմանը»,- ասել է Չավուշօղլուն։

Նա նաև նշել է, որ Թուրքիան սերտորեն համագործակցում է Իրանի հետ մի շարք տարածաշրջանային հարցերով, այդ թվում՝ Հարավային Կովկասում «3+3» ձևաչափի գործարկման համատեքստում։

Իրանական «Մեհր»-ի հաղորդմամբ՝ Չավուշօղլուն, մասնավորապես, ասել է․ «Ներկայում երկու երկրները համագործակցում են ոչ միայն երկկողմանի հարցերում, այլև տարածաշրջանային, ինչպիսիք են Աֆղանստանը, Իրաքը և Հարավային Կովկասի տարածաշրջանում կայունությունը։ Մենք պատրաստ ենք համագործակցել Իրանի հետ առաջարկվող «3+3» ձևաչափի շրջանակում»։

Հավելենք, որ Արցախյան 44-օրյա պատերազմից հետո թուրք-ադրբեջանական կողմն ակտիվորեն հանդես է գալիս տարածաշրջանային «3+3» ձևաչափի ստեղծման օգտին, որը պետք է ընդգրկի Հայաստանը, Ադրբեջանը, Վրաստանը, Իրանը, Թուրքիան ու ՌԴ-ն։ Այս հարցում թուրք-ադրբեջանական տանդեմին ակտիվորեն աջակցում է Ռուսաստանը։

Էմմա Չոբանյան