Ռուսաստանն ու Թուրքիան քննարկում են համատեղ սպառազինություններ մշակելու հարցը

ՌԴ-ն Թուրքիայի հետ քննարկում է ռուսական ռազմական արտադրանքի մատակարարումների և զենքի համատեղ մշակման հարցերը։ Այս մասին «Ինտերֆաքսի»-ին հայտնել է ՌԴ ռազմատեխնիկական համագործակցության դաշնային ծառայության տնօրեն Դմիտրի Շուգաևը։

«Շարունակվում են ռուսական ժամանակակից ռազմական արտադրանքի մատակարարման, ինչպես նաև սպառազինությունների համատեղ մշակման շուրջ բանակցությունները»,- ասել է Շուգաևը Dubai Airshow շրջանակում՝ պատասխանելով Թուրքիայի հետ ռազմատեխնիկական համագործակցության հեռանկարի ու Անկարային S-400 հակաօդային պաշտպանության համակարգերի նոր խմբաքանակի մատակարարման պայմանագրի ստորագրման հնարավոր ժամկետների մասին հարցին։

«Թուրքիայի Հանրապետության հետ ռազմատեխնիկական համագործակցությունը կայուն կերպով զարգանում է»,- ասել է Շուգաևը՝ նշելով, որ S-400 համակարգերի նկատմամբ տարածաշրջանի շատ երկրներ են հետաքրքրություն ցուցաբերում։

Թուրքիան ՌԴ-ից գնել է 2,5 միլիարդ դոլար արժողությամբ S-400 ՀՕՊ համակարգերի չորս դիվիզիոն: 2019 թվականի հոկտեմբերի 23-ին «Ռոսօբորոնէքսպորտը» հայտարարեց, որ Ռուսաստանը ժամկետից շուտ է կատարել պայմանագիրը՝ Թուրքիային մատակարարելով S-400 համակարգերի բոլոր տարրերը, այդ թվում՝ հրթիռները։ 2020 թվականի դեկտեմբերի 7-ին էլ «Ռոստեխ» ընկերության ղեկավար Սերգեյ Չեմեզովն ասել էր, որ Թուրքիան վճարել է համակարգերի համար։

Պաշտոնապես նաև հաղորդվում էր, որ Ռուսաստանը Թուրքիային առաջարկել է գնել այլ զինատեսակներ, մասնավորապես՝ չորրորդ սերնդի Սու-35 կործանիչներ։

Նշենք, որ ԱՄՆ-ն Թուրքիայի նկատմամբ մի շարք պատժամիջոցներ է սահմանել ռուսական S-400 համակարգերին ձեռքբերման պատճառով ու հեռացրել հինգերորդ սերնդի F-35 կործանիչների ծրագրից։
Էմմա Չոբանյան