Վրաստանի ՔԿԾ-ն կրկին հրաժարվել է Միխայիլ Սաակաշվիլիին տեղափոխել դատարան՝ հերթական դատական ​​նիստին մասնակցելու

Վրաստանի Արդարադատության նախարարության հատուկ քրեակատարողական ծառայությունը կրկին հրաժարվում է նախկին նախագահ Միխայիլ Սաակաշվիլիին տեղափոխել դատարան՝ հերթական դատական ​​նիստին մասնակցելու՝ անվտանգության նկատառումներից ելնելով։ Այս մասին ասվում է գերատեսչության տարածած հաղորդագրության մեջ։

«Պետական ​​անվտանգության ծառայությունից պահանջված տեղեկատվության համաձայն՝ դատապարտյալ Միխայիլ Սաակաշվիլիին, անվտանգության նկատառումներով, դատարանի դահլիճ տեղափոխելը որոշակի ռիսկերի հետ է կապված։ Այս փուլում դատապարտյալ Միխայիլ Սաակաշվիլին հրաժարվում է բուժման զգալի մասից․ դատաքննությանը տեղափոխելը լրացուցիչ վտանգներ է ստեղծում նրա առողջության համար»,- ասված է Հատուկ քրեակատարողական ծառայության հաղորդագրությունում։

Մինչդեռ Արդարադատության նախարարությունն առաջարկում է Սաակաշվիլիի դատավարությունն անցկացնել հեռավար կարգով կամ բանտային հիվանդանոցում։

«Համապատասխան որոշում կայացնելու դեպքում Հատուկ քրեակատարողական ծառայությունը կապահովի  մեղադրյալ Միխայիլ Սաակաշվիլիի հեռավար մասնակցություն դատավարությանը, ինչպես նաև, հնարավոր է, դատապարտյալների/մեղադրյալների համար դատավարության անցկացում թիվ 18 բուժհաստատությունում»,- հավելել են գերատեսչությունից։

Այսօր նախանշված է ավելի քան 2,7 մլն դոլար պետական ​​միջոցների յուրացման գործով դատավարությունը, որում որպես մեղադրյալ ներգրավված են Սաակաշվիլին և նախկին նախագահի անվտանգության նախկին ղեկավար, պատգամավոր Թեյմուրազ Ջանաշիան։

Նոյեմբերի 10-ին էլ Թբիլիսիի քաղաքային դատարանում նիստ էր անցկացվել՝ 2007 թվականի նոյեմբերի 7-ին ընդդիմության ցույցը կոշտ ցրելու և «Իմեդի» հեռուստաընկերության գրասենյակի ջարդուփշուրի գործով, որում մեղադրվում է նաև Սահակաշվիլին։ Այդ ժամանակ ևս հատուկ քրեակատարողական ծառայությունը հրաժարվել էր նրան տեղափոխել դատարան՝ անվտանգության նկատառումներից ելնելով։

Տաթև Ֆռանգյան