19.11.2024 | 18:23
Պարոն Իսկանդարյան, «калькулятор»-ը հանեք, հաշվենք․ Ավինյանը տրանսպորտի վճարների մուտքերն է հաշվում․ ՏԵՍԱՆՅՈՒԹ
«Անկախ դիտորդ»-ը` ՏԻՄ ընտրություններում 12:00-ի դրությամբ դիտարկման արդյունքների վերաբերյալ
Քաղաքականություն
14.11.2021 | 13:59
Ստորև ներկայացնում ենք «Անկախ դիտորդ»-ի հայտարարությունը` ՏԻՄ ընտրություններում 12:00-ի դրությամբ դիտարկման արդյունքների վերաբերյալ․
«Անկախ դիտորդ» դիտորդական առաքելությունը 2021 թ. նոյեմբերի 14-ի առավոտյան 7:00-ից սկսած դիտարկում է Կապան, Իջևան, Ստեփանավան, Լերմոնտովո և Արզնի համայնքների ավագանու ընտրությունները 33 տեղամասերում և 3 Ընտրատարածքային ընտրական հանձնաժողովներում: Բոլոր համայնքներում քվեարկությունն իրականացվում է 1 քվեաթերթիկով, և ընտրողները քվեարկում են՝ գրիչով նշում կատարելով։
Առաքելության դիտորդները տեղաբաշխված են հունիսի 20-ի ԱԺ ընտրությունների քվեարկության ընթացքում ընտրական տարբեր վարք դրսևորած տեղամասերում, ինչպես և այցելում են մյուս տեղամասերը և շրջագայության միջոցով դիտարկում համայնքներում ընդհանուր մթնոլորտն ու իրավիճակը: Շրջիկ դիտորդական խմբերը դիտարկել են նաև հանձնաժողովի նիստը լրացուցիչ տեղամասերում։
Ստորև ներկայացնում ենք 35 տեղամասերում 07:00-08:00 ժամանակահատվածի վիճակագրական արդյունքները և մինչև ժամը 12:00-ն առաքելության իրավաբանների և շրջիկ խմբերի կողմից արձանագրված միջադեպերը:
Այսպես, հանձնաժողովի նիստի ընթացքում դիտարկված 33 տեղամասային կենտրոններից 4-ում ՏԸՀ նիստը նախատեսված 7։00-ի փոխարեն մեկնարկել է 5-15 րոպե ուշացումով՝ հանձնաժողովի անդամների ուշացման և դրա հետևանքով քվորում չլինելու պատճառով։
Դիտարկված 3 տեղամասային կենտրոններից 1-ում քվեարկության սենյակը գտնվել է նկուղում, իսկ 4 դեպքում՝ 2-րդ հարկում:
7 տեղամասային կենտրոններ գնահատվել են որպես բացարձակապես ոչ մատչելի, աստիճաններով մուտքի դեպքում չեն ունեցել թեքահարթակ և լայն մուտք, իսկ քվեարկության սենյակում և քվեախցիկում հնարավոր չի եղել ազատորեն տեղաշարժվել:
Տեսողության խնդիրներ ունեցող անձանց ինքնուրույն քվեարկության համար նախատեսված հատուկ միջոցներ առկա չեն դիտարկված տեղամասերից 21-ում։ 1 քվեասենյակում լուսավորությունը գնահատվել է ոչ բավարար։
Դիտարկված տեղամասերից 2-ում հանձնաժողովի գործառույթները վիճակահանությամբ չեն բաշխվել․ մեկ դեպքում քարտուղարն է ինքնուրույն լրացրել բաշխումը, իսկ մեկ դեպքում տեղեկացրել են, որ նախորդ օրն են իրականացրել վիճակահանությունը։
Միայն Կապանի մեկ տեղամասում դիտարկվել է վնասված՝ պատռված քվեաթերթիկ, որը հանվել է տրցակից նախագահի կողմից։
2 տեղամասերում քվեարկության սենյակներում քվեախցիկների hետևում եղել է բաց տարածք, իսկ մեկում քվեախցիկների միջև հեռավորությունը 1 մետրից պակաս է եղել։
Մեկ տեղամասում արձանագրվել է քվեասենյակում ներկա գտնվելու իրավունք չունեցող ոստիկանի ներկայություն․ ոստիկանն իր ներկայությունը հիմնավորել է՝ պնդելով, որ տեսախցիկների բացակայության դեպքում իրենք պետք է գտնվեն քվեարկության սենյակում։ Ուշագրավ է, որ ևս երկու տեղամասերում գրանցվել են միևնույն կուսակցության 3-ական վստահված անձինք, որոնք քվեասենյակում ներկա են լինում «հերթափոխով»:
Դիտարկված ընտրատեղամասերից միայն 12-ում ներկայացված չեն եղել առաջադրվող ուժերից որևէ մեկի վստահված անձինք, որոնցից 9-ը՝ Իջևան համայնքում:
Կապան քաղաքի ընտրատեղամասերից մեկի հարակից տարածքում նկատվել են մարդկանց կուտակում:
«Անկախ դիտորդը» շարունակում է հետևել ընտրությունների ընթացքին տեղամասերում դիտորդների և շրջիկ դիտորդական խմբերի միջոցով:
«Ընտրություններ բոլորի համար 2021 – տեղական դիտորդություն և քաղաքացիական հասարակության կողմից քաղաքացիների իրավազորում» ծրագիրն իրականացվում է ՕքսԵՋեն հիմնադրամի, Հելսինկյան քաղաքացիական ասամբլեայի Վանաձորի գրասենյակի, «Իրազեկ քաղաքացիների միավորում» ՀԿ-ի և Քաղաքական դասընթացների երևանյան դպրոցի հետ համատեղ:
Ծրագիրը ֆինանսավորվում է Եվրոպական միության կողմից:
«Անկախ դիտորդ» հասարակական դաշինքը դիտորդություն է իրականացնում հետևյալ անդամ և գործընկեր կառույցների հետ․
Հելսինկյան քաղաքացիական ասամբլեայի Վանաձորի գրասենյակ ՀԿ
«Իրազեկ քաղաքացիների միավորում» ՀԿ
«Գյումրու առաջընթաց» ՔՀԶԿ
«Կանանց իրավունքների տուն» ՀԿ
«Գյումրու ռեստարտ նախաձեռնությունների կենտրոն» ՀԿ
«Ուղղակի ժողովրդավարություն» ՀԿ
«Գորիսի մամուլի ակումբ» ՀԿ
