11.10.2026 | 14:16
Թրամփն առաջարկել է Ատլանտյան օվկիանոսը վերանվանել իր պատվին
Էրդողանը հայտարարել է, որ Նախիջևանով երթուղին շատ կարևոր է և պետք է վերացնել Թյուրքալեզու պետությունների համագործակցության խոչընդոտները
Քաղաքականություն
12.11.2021 | 19:01
Թուրքիայի նախագահ Ռեջեփ Թայիփ Էրդողանը հայտարարել է, որ Թյուրքալեզու պետությունների համագործակցության խորհրդի անվանումը փոխվելու է «Թյուրքական պետությունների կազմակերպության», գրում է «Անադոլու» գործակալությունը։
«Խոսքը ոչ միայն կազմակերպության անվանման փոփոխության մասին է․ փոփոխությունները պետք է տեղի ունենան իրական քայլերում։ Մեր երկրները պետք է ավելի ակտիվ օգտագործեն կազմակերպության գործիքակազմը այն հարցերում, որոնք վերաբերվում են համագործացությանն ու տարածաշրջանային հարցերին»,- ասել է Էրդողանը Ստամբուլում Թյուրքական խորհրդի ղեկավարների գագաթնաժողովի ընթացքում։
Թուրքիայի նախագահը գոհունակություն է հայտնել Թուրքմենստանի նախագահ Կուրբանգուլի Բերդիմուհամեդովի՝ գագաթնաժողովին մասնակցելու կապակցությամբ, որի ղեկավարած երկիրը դիտորդի կարգավիճակ է ստանալու Թյուրքական պետությունների կազմակերպությունում։ Նա նաև Ադրբեջանին է շնորհակալություն հայտնել՝ կազմակերպությունում նախագահության ընթացքում դրա զարգացման գործում ակտիվ ներդրման համար։
Էրդողանը կոչ է արել վերացնել թյուրքալեզու պետությունների համագործակցության ճանապարհի խոչընդոտները։ Նա անբավարար է անվանել կազմակերպության անդամ-պետությունների միջև առևտրաշրջանառությունը։
«Մեր երկրների միջև ապրանքաշրջանառությունը հասնում է 21 միլիարդ դոլարի, ինչը կազմում է աշխարհի այլ երկրների հետ ապրանքաշրջանառության ծավալի ընդամենը 3 տոկոսը։ Թյուրքական խորհրդի երկրները պետք է զարգացնեն տրանսպորտային հաղորդակցությունը, համակցված փոխադրումները, ինչպես նաև ակտիվորեն օգտագործեն Կասպից ծովով «Միջին միջանցքը»։ Կարևոր է նաև Նախիջևանով երթուղին»,- ասել է Էրդողանը՝ նշելով, որ թյուրքալեզու պետությունները պետք է համատեղ ծրագրեր իրականացնեն «Տնտեսության կանաչ զարգացում» էկոլոգիական հայեցակարգի շրջանակում։
Էմմա Չոբանյան
