Մհեր Գրիգորյանը վիճել է Ադրբեջանի վարչապետի հետ ԱՊՀ կառավարության ղեկավարների խորհրդի նիստում․ ՏԵՍԱՆՅՈՒԹ

ԱՊՀ կառավարությունների ղեկավարների խորհրդի նիստում բանավեճ է գրանցվել ՀՀ փոխվարչապետ Մհեր Գրիգորյանի ու Ադրբեջանի վարչապետ Ալի Ասադովի միջև։

«Չնայած նոյեմբերի 9-ին ստանձնած պարտավորություններին, Ադրբեջանը շարունակում է տորպեդահարել ձեռք բերված պայմանավորվածությունների կատարումը, ներառյալ բազմաթիվ հայ ռազմագերիների գերության մեջ պահելը, ինչը ոչ միայն 2020 թվականի նոյեմբերի 9-ի եռակողմ հայտարարության 8-րդ կետի կոպիտ խախտում է, այլ նաև միջազգային մարդասիրական իրավունքի: Խեղաթյուրելով 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների դրույթները՝ Ադրբեջանը ուռճացնում է միջանցքի գաղափարը՝ բարձրաձայնելով ուժի կիրառման սպառնալիքների մասին»,- հայտարարել է ՀՀ փոխվարչապետ Մհեր Գրիգորյանը՝ շեշտելով, որ Լեռնային Ղարաբաղի հակամարտությունը չի կարող լուծվել ուժային ճանապարհով:

ՀՀ փոխվարչապետի ելույթից հետո մտքերի փոխանակման ժամանակ Ադրբեջանի վարչապետը խոսք է խնդրել ՝ հակադարձելով Մհեր Գրիգորյանին ու հայտարարելով, թե Ադրբեջանը հավատարիմ է նոյեմբերի 9-ի համաձայնագրի բոլոր դրույթների կատարմանը։ Ադրբեջանցի պաշտոնյան պնդել է, թե Ադրբեջանը ռազմագերիների վերադարձման վերաբերյալ համաձայնագրի դրույթները ևս կատարում է և որ վերադարձրել է «դիվերստանտ» հանդիսացող 29 հայ ռազմագերիներին, նրանցից «33-ը դատապարտված են Ադրբեջանի դատարանների կողմից ու կկրեն համապատասխան դատական պատասխանատվությունը»։ Վերջինս նաև պնդել է, որ «Ադրբեջանի տարածքում ԼՂ հակամարտություն այլևս չկա։
Ադրբեջանի վարչապետի ելույթից հետո արձագանքնման իրավունք է խնդրել ՀՀ փոխվարչապետ Մհեր Գրիգորյանն ու պատասխանել է Ալի Ասադովին։
«ԼՂ հակամարտությունը չի կարող լուծվել ուժի միջոցով։Հակամարտության կարգավորմանը կարելի է հասնել խաղաղ բանակցությունների միջոցով՝ բացառապես ԵԱՀԿ Մինսկի խմբի համանախագահության մանդատի շրջանակներում։ Իրավիճակը լիցքաթափելու և տարածաշրջանի խաղաղ զարգացման փուլ մտնելու համար անհրաժեշտ է, որ Ադրբեջանը կառուցողական դիրքորոշում որդեգրի՝ հրաժարվելով ատելության քաղաքականությունից, ագրեսիվ հռետորաբանությունից և թշնամական գործողություններից»,- եզրափակել է Գրիգորյանը:
Մանրամասները՝ տեսանյութում

Տաթև Ֆռանգյան