06.03.2026 | 10:24
Թրամփը հայտարարել է, որ ցանկանում է ամբողջությամբ հեռացնել Իրանի ղեկավարությանը և «լավ առաջնորդի» դերի համար թեկնածուներ ունի
Ուկրաինայի քաղաքացիների միջամտությունը Վրաստանի ներքին գործերին անընդունելի է․ Ղարիբաշվիլին պատասխանել է Զելենսկիին
Քաղաքականություն
12.11.2021 | 14:48
Վրաստանի նախկին նախագահ և Ուկրաինայի քաղաքացի Միխայիլ Սաակաշվիլիի կալանավորման հետևանքով վրաց-ուկրաինական հարաբերություններում հերթական լարվածության ֆոնին Ուկրաինայի նախագահ Վլադիմիր Զելենսկին հեռախոսազրույց է ունեցել Վրաստանի վարչապետ Իրակլի Ղարիբաշվիլիի հետ։
«Վրաստանի վարչապետ Ղարիբաշվիլիի հետ հեռախոսազրույցում ես ընդգծել եմ, որ Ուկրաինայի քաղաքացի Միխայիլ Սաակաշվիլիի իրավունքները պետք է լիովին երաշխավորվեն միջազգային նորմերին համապատասխան։ Ես խնդրել եմ թույլ տալ Սաակաշվիլիի մորը, հարազատներին և ուկրաինացի բժիշկներին այցելել նրան»,- գրել է Զելենսկին Twitter-ում։
Զուգահեռաբար, զրույցի հետ կապված հայտարարություն է տարածվել Վրաստանի վարչապետի աշխատակազմը։ Հաղորդագրության մեջ նշվում է, որ զրույցը տեղի է ունեցել Ուկրաինայի նախագահի նախաձեռնությամբ, որի ընթացքում Վլադիմիր Զելենսկին հարցրել է Ուկրաինայի քաղաքացի Սաակաշվիլիի առողջական վիճակի մասին։
«Իրակլի Ղարիբաշվիլին նրան ասել է, որ Սաակաշվիլին, ինչպես և մյուս բանտարկյալները, գտնվում է ուղղիչ հիմնարկում, առաջին օրից հսկողության տակ է և շուրջօրյա ստանում է համապատասխան բուժօգնություն։ Վրաստանի կառավարության ղեկավարի խոսքով՝ Ուկրաինայի քաղաքացի Սաակաշվիլիին թույլատրվում է այցելել ինչպես փաստաբաններին, այնպես էլ ընտանիքի անդամներին, ինչպես նաև Վրաստանի խորհրդարանի պատգամավորներին, իսկ բանտ տեղափոխելու օրից հարյուրից ավելի մարդ է այցելել նրան»,- ասվում է հայտարարության մեջ։
Նշվում է, որ Վլադիմիր Զելենսկին բարձրացրել է Սաակաշվիլիին բանտային հիվանդանոց տեղափոխելու հարցը։ Ղարիբաշվիլին ասել է, որ «բանտարկյալ Միխայիլ Սաակաշվիլին դիմադրություն է ցույց տվել՝ վիրավորելով քրեակատարողական ծառայության աշխատակիցներին»։
Ղարիբաշվիլին Միխայիլ Սաակաշվիլիի գործողություններն անվանել է սադրիչ, ապակառուցողական և երկրի կայունությանը սպառնացող՝ ընդգծելով, որ Ուկրաինայի քաղաքացիների միջամտությունը Վրաստանի ներքին գործերին անընդունելի է։
«Վլադիմիր Զելենսկին պահանջել է դիտարկել հնարավորությունը և թույլ տալ ուկրաինացի բժիշկներին ստուգել Միխայիլ Սաակաշվիլիի առողջական վիճակը, ինչին ի պատասխան՝ Իրակլի Ղարիբաշվիլին ասել է, որ բանտարկյալ Սաակաշվիլիի առողջության մասին հոգում են Վրաստանի պրոֆեսիոնալ և բարձր որակավորում ունեցող բժիշկները»,- ասված է վրացական կողմի հայտարարության մեջ։
Տաթև Ֆռանգյան
