11.10.2026 | 14:46
Այսօր աղջիկ երեխաների միջազգային օրն է
Լեհաստանի վարչապետը Թուրքիային մեղադրել է ՌԴ-ի հետ միասին բելառուսալեհական սահմանին ներգաղթյալների ճգնաժամի ստեղծման համար
Քաղաքականություն
10.11.2021 | 18:56
Լեհաստանի վարչապետ Մատեուշ Մորավիցկին քննադատել է Թուրքիային՝ ներգաղթյալներին Բելառուս տեղափոխելու հարցում դերակատարման համար, ինչը հանգեցրել է բելառուսալեհական սահմանին ներգաղթյալների ճգնաժամի սրման։ Այս մասին գրում է «Ահվալ» գործակալությունը։
«Մեկ կամ երկու ամիս առաջ Թուրքիան, թվում էր, ցանկանում է մեզ հետ սերտորեն աշխատել։ Ես դա կբարձրաձայնեմ, կարծում եմ՝ այնտեղ էլ կլսեն, մենք տեսնում ենք թուրքական գործողությունների ամբողջական համապատասխանեցում Բելառուսի ու Ռուսաստանի հետ»,- պատասխանելով պատգամավոր Մաչել Գդուլայի հարցին՝ ասել է Մորավիցկին։
Նա նաև նշել է, որ Լեհաստանն իր օգնություն է առաջարկել Թուրքիային՝ ներառյալ անտառային հրդեհների դեմ պայքարում, որոնք բռնկվել էին ամռանը։
«Մեր օգնությունը հրդեհների դեմ պայքարում, մեր օգնությունը թուրքական զբոսաշրջային ոլորտին միակողմանի լավություն ստացվեց։ Մենք չենք ընդունում դա և մեր թուրք ընկերներին հասկացնում ենք այդ մասին»,- ասել է Լեհաստանի վարչապետը։
Լեհաստանի իշխանություններն առանձնացրել են այն ավիաընկերությունները, այդ թվում՝ թուրքական պետական Turkish Airlines-ը և ռուսական Aeroflot-ը, որոնք միգրանտներին Բելառուս են տեղափոխում: Եվրահանձնաժողովի նախագահ Ուրսուլա ֆոն դեր Լեյենը երկուշաբթի հայտարարել էր, որ ԵՄ-ն կուսումնասիրի, թե ինչպես պատժել երրորդ երկրների ավիաընկերություններին, որոնք ակտիվ են մարդկանց թրաֆիքինգի գործում։
Նշենք, որ Լեհաստանը բախվել է Բելառուսի հետ սահմանին միգրանտների հոսքին և շուրջ 15․000-անոց զորք է տեղակայել՝ նրանց հետ մղելու համար։
Էմմա Չոբանյան
