25.04.2026 | 10:49
Լարս ավտոճանապարհը փակ է
«3+3» թուրք-ռուսական պրոյեկտը միտված է ՀՀ պետականության վերջնական լուծարմանը և ծառայելու է ՌԴ-ի և Թուրքիայի հակաարևմտյան քաղաքականությանը․ հայտարարություն
Քաղաքականություն
09.11.2021 | 18:48
«Ինքնիշխան Հայաստան» կուսակցության ղեկավար Դավիթ Սանասարյանը, Պահպանողական կուսակցության նախագահ Միքայել Հայրապետյանն ու Հայաստանի Եվրոպական կուսակցության առաջնորդ Տիգրան Խզմալյանը հանդես են եկել համատեղ հայտարարությամբ, որը ներկայացնում ենք ստորև․
«Ռուս-թուրքական պայմանավորվածությամբ 2020թ. սեպտեմբերի 27-ին Ադրբեջանի սանձազերծած պատերազմի ռազմական ակտիվ գործողությունների «ավարտին» Թուրքիայի և Ռուսաստանի կողմից նոյեմբերի 9-ին Հայաստանին պարտադրվեց ստորագրել հակահայկական և միջազգայնորեն անընդունելի հայտարարություն, ինչպես դա արել էին ուղիղ 100 տարի առաջ:
Մեկ տարի շարունակ ռուս-թուրք-ադրբեջանական կողմը փորձում է ճնշման ներքո փաստաթղթավորել կատարված հանցագործությունը և իրենց տարածաշրաջանային նկրտումները՝ ի հաշիվ Հայ պետականության և հայ ժողովրդի ազգային շահերի: Այսու՝ Արցախի հարցով ստեղծված ԵԱՀԿ Մինսկի խմբից դուրս ցանկացած ձևաչափում Արցախի խնդրի, ինչպես նաև Հայաստանի սահմազատման և սահմանագծման գործընթաց աղետաբեր կլինի Հայաստանի սուբյեկտայնության, անվտանգության և կենսունակության համար:
Ըստ այսմ հայտարարում ենք.
Ա. Անընդունելի է Հայաստան-Ադրբեջան խնդրի կարգավորման որևէ ձևաչափ Ռուսաստանի բացահայտ և Թուրքիայի քողարկված կնքահայրությամբ:
Բ. «3+3» թուրք-ռուսական պրոյեկտը, որպես մի նոր Կարսի ապօրինի պայմանագիր, միտված է Հայաստանի պետականության վերջնական լուծարմանը և ծառայելու է բացառապես Ռուսաստանի և Թուրքիայի տարածաշրջանային հակաարևմտյան քաղաքականությանը:
Հայաստանի դեմ սանձազերծված պատերազմը չի ավարտվել, այն շարունակվում է հիբրիդային պատերազմի տեսքով: Հայաստանի քաղաքացիներին, կառավարությանը և քաղաքական բոլոր ուժերին հորդորում ենք միակամությամբ պայքարել վիժեցնելու համար տարածաշրջանը միմյանց միջև կիսելու, քաղաքակրթության մուտքը տարածաշրջան արգելելու ռուս-թուրքական պայմանավորվածությունը, որտեղ Հայաստանի պետականության ապագան և հայ ժողովրդի ազգային շահը դիտարկվում է որպես մանրադրամ:
Քաղաքակիրթ աշխարհին, մասնավորապես ԱՄՆ-ին և եվրոպական երկրներին ահազանգում ենք, որ չի կարելի է քաղաքակրթական պատերազմի առաջապահ սահմանապահ Հայաստանին միայնակ թողնել բռնապետական ռեժիմների հոշոտման առջև, ինչպես դա, ցավոք, արվեց համավարակի մոլեգնման պայմաններում սանձազերծված ագրեսիայի 44 օրերին: Արևմտյան քաղաքակրթության ամենաարևելյան դաշնակից-սահմանապահ ժողովուրդն ու պետությունը կենաց-մահու հիբրիդային պատերազմի մեջ են և դեռ չեն պարտվել ու չեն պարտվելու:
Միքայէլ Հայրապետեան ՊԱՀՊԱՆՈՂԱԿԱՆ ԿՈՒՍԱԿՑՈՒԹՅՈՒՆ
Տիգրան Խզմալյան ՀԱՅԱՍՏԱՆԻ ԵՎՐՈՊԱԿԱՆ ԿՈՒՍԱԿՑՈՒԹՅՈՒՆ
Դավիթ Սանասարյան «ԻՆՔՆԻՇԽԱՆ ՀԱՅԱՍՏԱՆ» ԿՈՒՍԱԿՑՈՒԹՅՈՒՆ»
