Թուրքիան ՌԴ-ի հետ բանակցություններ է վարում Սիրիայում քրդերի դեմ նոր գործողության շուրջ․ թուրք պաշտոնյա

Թուրքիայի անվտանգության բարձրաստիճան պաշտոնյան Reuters գործակալությանը պատմել է, որ Անկարան պատրաստվում է Հյուսիսային Սիրիայում նոր հարձակում սկսել Քրդական ժողովրդական պաշտպանության միավորումների (YPG) դեմ, փոխանցում է Duvar-ը։

«Գործողությունը կսկսվի այն ժամանակ, երբ ավարտվեն բոլոր նախապատրաստությունները»,- ասել է պաշտոնյան անանունության պայմանով։

YPG-ի վրա հարձակվելու՝ Թուրքիայի ջանքերը բարդացել են միավորման՝ ԱՄՆ-ի ու ՌԴ-ի հետ կապերի պատճառով, որոնք երկուսն էլ աշխատում են YPG-ի ու Սիրիական դեմակրատական ուժերի հետ։

«Այս հարցը մենք համակարգում ենք Ռուսաստանի հետ։ Այն արդեն քննարկվել է ԱՄՆ-ի հետ»,- ասել թուրք պաշտոնյան։

SDF-ի աղբյուրներն էլ ասում են, որ Թուրքիայի վերջին երկու շաբաթներին ակտիվացրել է հարձակումներն անօդաչուների ու հրետանու կիրառմամբ, որոնք Թուրքիայի տարածքից են օգտագործվել ՝թիրախավորելով YPG-ի դիրքերը։

Լարվածությունն աճել է այն բանից հետո, երբ մեկ ամիս առաջ երկու թուրք ոստիկան է սպանվել Հյուսիսային Սիրիայում հրթիռային հարվածից, որի համար Անկարան մեղադրում է YPG-ին։ Դրանից հետո Թուրքիայի նախագահ Ռեջեփ Թայիփ Էրդողանը հայտարարեց, որ Անկարայի համբերությունը սպառվել է՝ ազդարարելով հնարավոր նոր հարձակման մասին։

Միաժամանակ, սիրիացի զինյալները պատրաստ են միավորվել՝ Թուրքիայի հնարավոր գործողության դեպքում։ Reuters-ը, հղում կատարելով զինյալների աղբյուրներին, գրում է, որ Թուրքիան վերջերս սպառազինություն է ուղարկել իր սիրիացի դաշնակիցներին, որպես գործողության նախապատրաստում և զինյալները վերաբաշխվելու են այն տարածքներում, որոնք հնարավոր է՝ դառնան նոր հարձակման թիրախը։

«Լիակատար պատրաստվածության համար հիմա շատ քիչ ժամանակ է պահանջվում՝ մինչև ռազմական գործողության հայտարարումը»,- ասել է թուրքամետ  «Ազգային բանակ» զինյալների խմբավորման խոսնակ Յուսեֆ Համուդը։

Էմմա Չոբանյան