17.11.2024 | 23:31
Պաշտոնանկություններ կառավարությունում․ 2 նախարար, ուժային կառույցների ղեկավարներ ու ՊԵԿ նախագահն ազատման դիմում են ներկայացրել
Ժողովրդավարությունը և կոռուպցիայի դեմ պայքարը պետք է դրվեն այնպիսի ռելսերի վրա, որ իրապես անձանցից կախված չլինի․ Քննարկում՝ ՀՀ-ԵՄ համաձայնագրի կետերի իրականացման շուրջ
Քաղաքականություն
07.10.2021 | 20:32
Ասել, թե նախորդ տարվա իրադարձությունները՝ Արցախյան երկրորդ պատերազմը, COVID-19-ի տարածումը չեն ազդել Համապարփակ և ընդլայնված գործընկերության համաձայնագրի (ՀԸԳՀ) իրականացման ընթացքի վրա, սխալ կլինի, բայց ասել, թե շատ է ազդել, կլինի չափազանցություն։ Factor TV-ի «Ուշադրության կենտրոնում» հաղորդաշարի առաջին թողարկմանը նման տեսակետ հայտնեց ՀՀ արդարադատության նախարարի առաջին տեղակալ Քրիստիննե Գրիգորյանը։
Հաղորդման ուշադրության կենտրոնում էր ՀԸԳՀ–ում ժողովրդավարության ամրապնդմանը, մարդու իրավունքների պաշտպանությանը, օրենքի գերակայությանն ուղղված, դատաիրավական բարեփոխումներին վերաբերող դրույթների իրականացման ընթացքը։
Քննարկմանը փոխնախարարի հետ մասնակցում էին ԱԺ «Քաղաքացիական պայմանագիր» խմբակցության պատգամավոր, Եվրաինտեգրման հարցերի մշտական հանձնաժողովի նախագահ Արման Եղոյանը, «Իրազեկ քաղաքացիների միավորում» ՀԿ ծրագրերի համակարգով Դանիել Իոաննիսյանը։
Ըստ Քրիստինե Գրիգորյանի՝ համաձայնագրի իրականացման գործընթացը դանդաղեց նաև արտահերթ խորհրդարանական ընտրությունների պատճառով։
Արման Եղոյանի խոսքով էլ՝ այս պահին Համաձայնագրի ճանապարհային քարտեզի ժամանակացույցից հետ մնալը, մի քանի ամիս ուշացումը մեծ խնդիր չէ։
«Կարևորն այն է, որ կա քաղաքական կամք, և ամեն ինչ կատարվում է ըստ նախատեսվածի»,- ասաց նա։
Հաղորդման հյուրերը համաձայնեցին՝ Համաձայնագրի կարևորագույն կետերից են դատաիրավական բարեփոխումները։ Քրիստինե Գրիգորյանի խոսքով՝ Դատաիրավական ոլորտի բարեփոխումների ռազմավարությունը, որ հաստատվել է 2019 թվականին, մշակվել էր Եվրոպայի խորհրդի և Եվրամիության փորձագետների աջակցությամբ։ Նրա խոսքով՝ ներդրվել և ներդրվում են մեխանիզմներ դատական համակարգի անաչառությունը, անցումային արդարադատությունն ապահովելու համար, սակայն ասել, որ այս մեկ տարվա ընթացքում խնդիրները լուծվել են, սխալ կլինի։
«Բայց կան գործեր, որոնք ցույց են տալիս, որ այդ մեխանիզմների ներդրումը աշխատող լուծում է»,- ասաց նա։
Խոսելով արդեն վեթինգի կիրառման մասին՝ լինելո՞ւ է այն, թե՞ ոչ, նա նշեց․ «Խոսքն այստեղ օրինական ճանապարհով կոռումպացված դատավորներին համակարգից դուրս բերելու մասին է»։
Դանիել Իոաննիսյանի խոսքով՝ ինքը կցանկանար, որ ՀՀ-ԵՄ համաձայնագրի իրականացման արդյունքում ժողովրդավարությունը դրվեր ինստիտուցիոնալ ռելսերի վրա։
«Այդ պրոցեսը Հայաստանում, իրոք, կաղում է։ Ժողովրդավարությունը և կոռուպցիայի դեմ պայքարը պետք է դրվեն այնպիսի ռելսերի վրա, որ իրապես անձանցից կախված չլինի, ընդհանրապես էական չլինի, թե ով է վարչապետը, ով է այս կամ այն մարմնի ղեկավարը։ Սա շատ կարևոր է։ Այս պահին մեզ մոտ ամեն ինչ կախված է մարդկանցից։ Կարող է երկու անձի փոխես, ժողովրդավարության վիճակը էապես լավանա կամ վատանա»,- ասաց նա՝ նշելով, որ պետք է առավելագույն ուժերը գործի դնել ինստիտուցիոնալիզացիայի համար։
Մանրամասները՝ տեսանյութում։
Հռիփսիմե Հովհաննիսյան
