19.12.2025 | 23:33
ԱՄՆ-ի, Ռուսաստանի և Ուկրաինայի բանակցությունների նոր փուլը տեղի կունենա ԱՄՆ-ում առաջիկա օրերին
«Օսիպյանին պետք է աջ ոտից խփենք». շարունակում են հրապարակվել «Սասնա ծռերի» հեռախոսազրույցները
Հասարակություն
21.03.2018 | 16:26
Ինչպես արդեն տեղեկացրել ենք, այսօր Երևանի ընդհանուր իրավասության դատարանի Շենգավիթի նստավայրում ընթանում է «Սասնա ծռերի» 10 անդամների գործով դատական նիստը, որի ժամանակ դատախազները հրապարակում են ոստիկանության ՊՊԾ գնդի գրավման օրերին «Սասնա ծռերի» հեռախոսազրույցները։
Հեռախոսազրույցների հրապարակված վերծանություններից մեկից պարզ է դառնում, որ ՊՊԾ գնդի ներսում գտնվելու օրերին «Սասնա ծռերից» մեկի հեռախոսահամարը 6-7 հազար դրամով լիցքավորել է «ԳԱԼԱ»-ն։ Հրապարակված հեռախոսազրույցների արձանագրություններից մեկում էլ Արայիկ Խանդոյանը խոսում է սպանված ոստիկանի մասին. «Մուխտառ գյադա էր, ինքն իրա խելքից մեռավ»:
Մեկ այլ խոսակցության մեջ Սմբատ Բարսեղյանն ասում է . «Մի քանի ոստիկան է սպանվել, բայց ժողովուրդը ոտքի չի հելնում»:
Ըստ դատախազի հրապարակած վերծանումների, մեկ այլ հեռախոսազրույցի մեջ էլ Բարսեղյանն ասում է. «Օսիպյանին պետք ա աջ ոտից խփենք, իսկ ժողովուրդը թող զինվի բենզինով»։
Ներսում գտնվող անձանց հետ պարբերաբար հեռախոսազրույցներ է ունեցել Կարո Եղնուկյանը, նա ճշտել է՝ արդյոք ներսում գտնվող «Սասնա ծռերի» անդամների մեջ թունավորվածներ կան, թե ոչ: Ներսում գտնվողներն ասել են, որ իրենց մեջ կա մարդ, որն իրեն վատ է զգում, բայց թունավորման դեպքեր չեն գրանցվել: Հեռախոսազրույցներից մեկի ժամանակ էլ Կարո Եղնուկյանին Անդրիաս անունով մեկն առաջարկել է պատանդներին ականապատել և միասին փորձել դուրս գալ գնդի տարածքից: Կարո Եղնուկյանը, սակայն, դեմ է եղել նման քայլի:
Դատախազները շարունակում են ընթերցել արձանագրությունները, որոնց կհաջորդեն ամբաստանյալների հայտարարությունները:
