15.12.2025 | 14:32
Վիզաների ազատակացման գործընթացում առաջընթացը շատ կարևոր է ՀՀ քաղաքացիների համար․ Արարատ Միրզոյան
Մենք չենք ունեցել ԼՂ հարցի կարգավորման ռազմավարություն. Նիկոլ Փաշինյան․ ՏԵՍԱՆՅՈՒԹ
Քաղաքականություն
24.08.2021 | 10:33
«ԼՂ հիմնախնդրի բանակցային գործընթացի մեկնարկից ի վեր Ադրբեջանը հստակ ձևակերպել է իր անելիքը,- այսօր Ազգային ժողովում Կառավարության ծրագիրը ներկայացնելիս այս մասին հայտարարեց վարչապետ Նիկոլ Փաշինյանը: -Ըստ ադրբեջանական խոսույթի՝ Լեռնային Ղարաբաղն Ադրբեջան է, հարակից շրջանները՝ առավել ևս: Ըստ ադրբեջանական խոսույթի՝ չկա ԼՂ ինքնավար մարզ, առավել ևս չկա Լեռնային Ղարաբաղի Հանրապետություն: Նրանք մշտապես ձևակերպել են ԼՂ-ն և հարակից շրջաններն իրենց հսկողության տակ վերցնելու օրակարգը և պարզաբանել՝ եթե դա չստացվի բանակցությունների միջոցով, պատրաստվում են անել ռազմական ճանապարհով և բանակցություններին զուգահեռ միլիարդավոր դոլարներ են ծախսել սպառազինությունների ձեռքբերման և այլ ռազմական ծախսերի վրա»:
Փաշինյանի խոսքով՝ նման որոշակիություն չի եղել հայկական խոսույթում:
«Այո՛, ձևակերպվել է ԼՂ անկախության միջազգային ճանաչման խնդիրը, բայց արդեն սա շատերը համարել են դավաճանություն՝ հղում անելով 1989 թվականի դեկտեմբերի 1-ի ՀԽՍՀ ԳԽ և ԼՂ ազգային խորհրդի համատեղ որոշմանը Հայկական ԽՍՀ-ի և ԼՂ-ի վերամիավորման մասին, որի վրա հղում է արվել 1998 թվականի օգոստոսի 23-ի Հայաստանի անկախության հռչակագրում: Ըստ այդ տեսակետի՝ Լեռնային Ղարաբաղը պետք էր ճանաչել Հայաստանի մաս»,- հավելեց վարչապետը:
Փաշինյանի խոսքով՝ հաջորդ տեսակետը «տարածքներ կարգավիճակի դիմաց» բանաձևն էր:
«Դրա համաձայն՝ ԼՂ հարակից տարածքների զիջման դիմաց պետք է հասնել Ղարաբաղի անկախության միջազգային ճանաչման, բայց այս տեսակետը դավաճանությունը համարողներ նույնպես կային՝ պնդելով, որ տարածքների զիջման բանաձևն անընդունելի է հայ ժողովրդի համար: Կար տարածքների փոխանակման կոնցեպտը, որի իմաստը Հայաստանի որոշ տարածքներ Ադրբեջանին զիջելու դիմաց ԼՂ-ն Հայաստանին միավորելն է: Այս բանաձևի շուրջ նույնպես, մեղմ, ասած, բացասական կարծիք կար հանրային, քաղաքական շրջանակներում, և շատերն այն դավաճանություն ու դավադրություն էին համարում»,- ասաց նա:
Ըստ Փաշինյանի, սակայն, սրանով խնդիրները չեն ավարտվել ու գործնական առումով կար շատ լուրջ բարդություն: «Եթե Ադրբեջանի ասելիքը նույնն էր թե՛ ներքին քննարկումների, թե՛ միջազգային հանրության հետ հաղորդակցության ընթացքում և թե՛ բանակցային սեղանի շուրջ, ընդ որում, այդ ասելիքի նկատմամբ նրանց մոտ կար հանրային կոնսենսուս, մեր պարագայում ասելիքներն ու դիրքորոշումները տարբեր էին: Ու ամենակարևորը՝ մենք չունեինք, չէինք ձևակերպել կարևոր հարցի պատասխանը՝ իսկ ի՞նչ էինք անելու, եթե բանակցային սեղանի շուրջ չհաջողվի մեզ համար ընդունելի լուծման հասնել: Ընդ որում՝ ես չեմ խոսում տարբեր իշխանությունների, կառավարությունների, ղեկավարների արածների կա չարածների մասին, այլ փորձում եմ ձևակերպել այն համակարգային խնդիրը, որ մենք ի սկզբանե ունեցել ենք ԼՂ հիմնախնդրի համատեքստում»,- ասաց Փաշինյանը:
«Մենք, որպես հանրություն չենք ունեցել ԼՂ հարցի կարգավորման ռազմավարություն, չենք արձանագրել դրա անհրաժեշտությունը և հետևաբար հարցը դուրս է թողնվել հանրային քաղաքական օրակարգից»,- ընդգծեց վարչապետը:
Մանրամասները՝ տեսանյութում:
