12.05.2025 | 15:02
«Հոկտեմբերի 27»-ի գործով Սեֆիլյանը հարցաքննվել է // Քոչարյանից միլիարդների բռնագանձում են պահանջում․ ԼՈՒՐԵՐ
Բաքուն պատրաստվում է հայաթափված Ստեփանակերտում Տնտեսական համագործակցության կազմակերպության գագաթնաժողով անցկացնել
Քաղաքականություն
24.04.2025 | 23:30
Բաքուն պատրաստվում է հայաթափված Ստեփանակերտում հերթական քարոզչական միջոցառումն անցկացնել։ Այս անգամ խոսքը Տնտեսական համագործակցության կազմակերպության գագաթնաժողովի անցկացման մասին է։
«Այս տարի Խանքենդիում (Ստեփանակերտ) կկայանա Տնտեսական համագործակցության կազմակերպության (ՏՀԿ) 17-րդ գագաթնաժողովը։ Այս տարվա թեման կլինի կայուն զարգացումը և կլիմայական պայմաններին դիմակայուն տնտեսական համագործակցությունը»,- ադրբեջանական լրատվամիջոցների հաղորդմամբ՝ «Ադրբեջանը և Տնտեսական համագործակցությունը. հնարավորություններ և հեռանկարներ» թեմայով քննարկման ժամանակ հայտարարել է երկրի ԱԳՆ տնտեսական համագործակցության վարչության պետի տեղակալ Ռովշան Միրզոևը:
Տնտեսական համագործակցության կազմակերպության XVI գագաթնաժողովը տեղի է ունեցել 2023 թվականի նոյեմբերի 9-ին Տաշքենդում։
Տնտեսական համագործակցության կազմակերպությունը 1964 թվականին հիմնադրված Տարածաշրջանային համագործակցության զարգացման կազմակերպության իրավահաջորդն է, որն ավարտել է գործունեությունը 1979 թվականին։ 1985 թվականին Իրանը, Պակիստանը և Թուրքիան միացել են՝ ձևավորելով կազմակերպությունը։ 1992 թվականի աշնանն այն ընդլայնվել է՝ ներառելով յոթ նոր անդամների՝ Աֆղանստան, Ադրբեջան, Ղազախստան, Ղրղզստան, Տաջիկստան, Թուրքմենստան և Ուզբեկստան։
Հիշեցնենք, որ ապրիլի սկզբին Բաքուն Ստեփանակերտում միջազգային ֆորում էր կազմակերպել, ապա ավելի ուշ կազմակերպել երկրում հավատարմագրված դիվանագիտական կորպուսի ներկայացուցիչների այցը։
Նշենք, որ էթնիկ զտման ենթարկված Ստեփանակերտ էին այցելել աքվում Թուրքիայի, Չինաստանի, Բելառուսի, Հունգարիայի, Բրազիլիայի, Ղրղզստանի, Տաջիկստանի, Ուզբեկստանի, Ուկրաինայի, Լատվիայի, Լիտվայի, Լեհաստանի, Ռումինիայի, Վրաստանի և այլ երկրների դեսպաններ։
Թարգմանությունը՝ Էմմա Չոբանյանի
