Քաղաքականություն
30.07.2021 | 21:27
Թուրքիան ու Ադրբեջանը ծրագրում են ավելի խորացնել ռազմական կապերը։ Այս մասին գրել է վերլուծաբան Փոլ Իդդոնը․ փոխանցում է «Ահվալ» գործակալությունը։
«Ադրբեջանի հետ ռազմական կապերի հետագա խորացումն օգնում է Թուրքիային իր և Ռուսաստանի միջև որոշ հեռավորություն պահպանել տարածաշրջանային ազդեցության համար», գրում է Իդդոնը՝ վկայակոչելով Սթրաթֆորի Մերձավոր Արևելքի ու Հյուսիսայի Աֆրիկայի ավագ վերլուծաբան Էմիլի Հոթհորնին։
Թուրքիայի և Ադրբեջանի նախագահները ստորագրեցին «Շուշիի հռչակագիրը», որը նախատեսում է ընդլայնել երկու երկրների քաղաքական, տնտեսական ու պաշտպանական կապերը։ Հռչակագրով երկու երկրները նախատեսում են «համատեղ ջանքներով վերակազմավորել ու արդիականացնել իրենց զինված ուժերը»։ Թուրքիայի նախագահ Ռեջեփ Թայիփ Էրդողանը նաև հայտարարել է, որ Թուրքիան Ադրբեջանում գործարան կկառուցի՝ տեխնոլոգիաները կիսելու և ռազմական համատեղ ռազմատեխնիկա արտադրելու համար:
Ըստ Իդդոնի՝ «երկու պետություն՝ մեկ ազգ» կարգախոսը, որը հաճախ օգտագործվում է երկրների միջև մշակութային և քաղաքական սերտ կապերը ընդգծելու համար, վերածվել է «երկու պետություն՝ մեկ ռազմական գործ՝ բանակ» կարգախոսի։
«Ադրբեջանը չունի ռազմարդյունաբերական հիմք, որը կարող է օգնել Թուրքիային զարգացնել ու կառուցել զենքերի համակարգեր։ Մյուս կողմից էլ, Բաքուն լի է էներգետիկ պաշարներով, որը կարող է օգնել՝ ֆինանսավորել թուրքական նոր սպառազինության համակարգերի հետազոտումն ու զարգացումը»,- գրում է Իդդոնը։
Անդրադառնալով Բաքվի հետ Անկարայի հարաբերությունների շուրջ Ռուսաստանի դիրքորոշմանը, Էմիլի Հոթհորնն ասել է, որ Մոսկվան «Թուրքիայի և Ադրբեջանի միջև զարգացող կապերին չի պատասխանի Հայաստանի հետ կապերի ամրապնդմամբ», այլ կկենտրոնանա Ադրբեջանի ուղղությամբ։
«Ռուսաստանն ամենամեծ զենքի մատակարարներից է Ադրբեջանին ու Հայաստանին և միշտ ձգտել է պահել հավասարակշռությունը երկու երկրների միջև»,- ասել է նա։ Հրապարակման մեջ նշվում է, որ Թուրքիայի և Ադրբեջանի հարաբերությունները հասան նոր բարձունքների Լեռնային Ղարաբաղի պատերազմի ժամանակ, որտեղ թուրքական ռազմական աջակցությունը վճռական նշանակություն ունեցավ Ադրբեջանի համար։
Էմմա Չոբանյան
