14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
«Երբ ձայն են տալիս ՀՀԿ-ին, չե՞ն գիտակցում, որ դրա արդյունքում իրենց համայնքները խոշորանալու են»․ Մ․ Թանդիլյան
Քաղաքականություն
08.06.2017 | 16:30
«Ելք» խմբակցության պատգամավոր Մանե Թանդիլյանը, ելույթ ունենալով «Հայաստանի Հանրապետության վարչատարածքային բաժանման մասին» ՀՀ օրենքում փոփոխություններ և լրացումներ կատարելու մասին, անդրադարձավ համայնքների խոշորացումից դժգոհող Վարդենիս-Մարտունի մայրուղին փակած բնակիչների խնդրին։
Պատգամավորը շեշտեց, եթե Կառավարության ներկայացուցիչներն ըստ պատշաճի նախագիծը քննարկած լինեին շահառուների հետ, այսօր նման պատկեր չէր լինի: «Եթե գյուղապետերը չեն արտահայտում բնակիչների կարծիքը, ուրեմն ձեր լսումներն արդյունավետ չեն եղել ու ուղղված չեն եղել շահառուներին»,- ասաց Թանդիլյանը՝ դիմելով նախագծի հիմնական զեկուցող Տարածքային կառավարման և զարգացման փոխնախարար Վաչե Տերտերյանին։
Պատգամավորը հետաքրքրվեց, թե արդյոք Կառավարությունը հետաքրքրվո՞ւմ է խոշորացված համայնքների բնակիչների հետագա ճակատագրով․ «Արդյոք վերջիններս կարողացե՞լ են հարմարվել նոր պայմաններում, իրենց տեղը գտնել խոշորացված համայնքներում, սրանք հարցեր են, որոնց ամբողջական պատկերն այս պահին չունենք»։
Ընդդիմադիր պատգամավորը անդրադառնալով գյուղացիների դժգոհությանը, նկատեց․ «Ուզում եմ քաղաքացիներն իրենց կատարած ընտրությունը կապեն առօրյա կյանքի հետ, երբ ձայն են տալիս ՀՀԿ-ին, չե՞ն գիտակցում, որ դրա արդյունքում իրենց համայնքները խոշորանալու են, փողոցներ են փակելու։ Այդ ինչպե՞ս է ստացվում, որ մի գյուղում 533 ձայնով ընտրվում են ՀՀԿ-ականները, 9 ձայնով՝ «Ելքը», բայց այս օրերին մենք իրենցից բավականին ահազանգեր ենք ստանում։ Առիթն օգտագործելով ուզում եմ ասել՝ ընտրության օրը կատարած ձեր ընտրությունը կապ ունի ձեր հետագա առօրյայի հետ»,- եզրափակեց Թանդիլյանը՝ հավելելով, որ ՀՀԿ-ն հանկարծակի չի ներկայացրել համայնքների խոշորացման ծրագիրը։
