Քաղաքականություն
06.07.2021 | 23:02
Թուրքիան դադարեցրել է ռուսական S-400 համակարգերի ակտիվացման իր պլանները ԱՄՆ-ի հետագա պատժամիջոցների պատճառով, սակայն դրանց ձեռքբերումը շարունակում է բացասական ազդեցություն ունենալ պաշտպանական ոլորտի վրա։ Այս մասին ասել է սյունակագիր, Middle East Forum-ի աշխատակից Բուրակ Բեքդիլը, հաղորդում է «Ահվալ» գործակալությունը։
«Թուրքիայի կողմից ռուսական հակաօդային պաշտպանության համակարգերի ձեռքբերումը, նույնիսկ դրանք ակտիվացնելու անկարողությունն ու դրա հետևանքները դասագրքային օրինակ են, թե ինչպես կարելի է սխալ վարվել ռազմական արդյունաբերության հետ՝ դիվանագիտության մեջ»,- գրում է Բեքդիլը իր հոդվածում։
Միացյալ Նահանգներն էլ Թուրքիային հեռացրել է F-35 կործանիչների ծրագրից ու պատժամիջոցներ սահմանել նրա ռազմական գնումների գործակալության նկատմամբ՝ ի պատասխան 2019 թվականին 2․5 մլրդ դոլարով ռուսական հրթիռների ձեռքբերման։ ԱՄՆ-ը նաև սպառնում է հետագա միջոցառումներ իրականացնել, եթե համակարգն ակտիվանա, և կոչ է անում Թուրքիային՝ դրանք վերադարձնել Ռուսաստանին։
Հիմա էլ Թուրքիան շանտաժի է ենթարկում ԱՄՆ-ին և ՆԱՏՕ-ին, որ կարող է գնել ռուսական Սու-57 կործանիչներ՝ F-35-երի փոխարեն, սակայն, ըստ Բեքդիլի, դա պարզապես «բլեֆ» է։
«Թուրքիայի ռազմաօդային ուժերի գեներալները շատ լավ գիտեն, որ ՆԱՏՕ-ի ստանդարտների ինքնաթիռից 70 տարի հետո ռուսականներին անցնելը նման չէ ամերիկյան մեքենան ճապոնականով փոխարինելուն։ Նոր օպերատիվ կառույցի կառուցումը, ավիաբազաների մոդիֆիկացումը, վերանորոգման, տեխնիկական նոր ծառայությունների համակարգի ստեղծումը չափազանց թանկ է, ժամանակատար ու տեխնոլոգիապես բարդ»,- նշում է Բեքդիլը։
Թուրքիան հպարտ է սեփական կործանիչների ծրագրով, բայց կառավարության կողմից հովանավորվող այս ծրագիրը միայն ներքին քաղաքական սպառման համար է նախատեսված։ Ըստ Բեքդիլի՝ դրանք հեքիաթներ են, որոնք թուրքերը սիրում են լսել։ Նա նաև նշում է, որ Ռուսաստանին քիչ է հետաքրքրում՝ ինչ կարող է Թուրքիան անել S-400-ների հետ։
«Դա վաճառք է։ Մենք մեր գումարը ստացել ենք: Թուրքերը կարող են հրթիռներով լողափ գնալ կամ դրանցով կարտոֆիլ տանել, դա մեզ չի մտահոգում»,- ըստ Բեքդիլի՝ ասել է Անկարայում ՌԴ դեսպան Ալեքսեյ Յերխովը։
Էմմա Չոբանյան
