Կրեմլի պարտադրանքով նշանակվեց արտահերթ ընտրության օպերացիան․ Վահե Գասպարյան. ՏԵՍԱՆՅՈՒԹ

«Կիսագաղութային այնպիսի երկրներում, ինչպիսին Հայաստանն է, ազատ և թափանցիկ ընտրություններ չեն լինում, լինում է քվեարկություն, որը չի արտացոլում ժողովրդի իղձերը և սպասելիքները»,- այս մասին այսօր հրավիրված ասուլիսում հայտարարեց Ազգային ժողովրդավարական բևեռի խորհրդի անդամ Վահե Գասպարյանը:

«Ազատ ընտրություն չի եղել է, եղել է ընդամենը քվեարկություն, այն էլ ժողովրդին պարտադրված վախերի և սպառնալիքների ներքո՝ «սևերի ու սպիտակների», նախկինների և ներկաների , նոր պատերազմի ու նոր ցեղասպանության: Սա նշանակում է, որ այն, ինչ մենք ասում էինք, կատարվեց. Կրեմլի պարտադրանքով նշանակվեց արտահերթ ընտրությունների օպերացիան, որը նպատակ ուներ կասեցնել ազգային զարթոնքը (որը սկսվում էր Ազգային ժոովրդավարական բևեռի ջանքերի շնորհիվ) և վերարտադրել այս համակարգը, այս իշխանություններին, ստեղծել ամբողջությամբ կրեմլահպատակ խորհրդարան, որտեղ ներկայացված են թե՛ «մուրճը», թե՛ «մանգաղը» և թե՛ «աստղը»: Եվ այդ խորհրդարանը պետք է շարունակի կատարել լավրովյան պլանի հաջորդ մասը, այն է՝ Մեղրիի միջանցք, սահմանազատում, ստորագրություն, հետո խորհրդարանի կողմից ռատիֆիկացիա և այլն»,- նշեց Գասպարյանը:

Նա նաև հայտարարեց, որ ԱԺԲ-ն Շարունակելու է ազգային ազատագրական պայքարը. «Մենք այն կոչել ենք «քաղաքական Սարդարապատ», որը նպատակ ունի նախ կանխել սահմանազատման և խորհրդային սահմանների ճանաչման այս ազգադավ գործընթացը, և ի վերջո երկրում հաստատել ազգային ժողովրդավարական պետություն»:

Մանրամասները՝ տեսանյութում: