Մի շարք հողամասեր՝ նույն համայնքում․ «Պատիվ ունեմ» դաշինքի պատգամավորության թեկնածու Աննա Մկրտչյանի ունեցվածքը

Factor.am-ը շարունակում է ներկայացնել արտահերթ խորհրդարանական ընտրություններին մասնակցող կուսակցությունների և կուսակցությունների դաշինքների ընտրական ցուցակի եռյակում տեղ գտած թեկնածուների գույքի և եկամուտների մասին հայտարարագրերի շարքը։

«Պատիվ ունեմ» դաշինքի անդամ Աննա Մկրտչյանը ԿԸՀ-ին ներկայացրած հայտարարագրում որպես անշարժ գույք է ներկայացրել 194․8 քմ մակերեսով 1 բնակելի տուն՝ Կոտայքի մարզի Քասախ համայնքի Տերյան 4-րդ փ․1 հասցեում։ Մկրտչյանն այս տան համասեփականատերերից է, նրան համատեղ սեփականության իրավունքով պատկանում է նաև նույն հասցեում գտնվող 0․5717 հա հողամաս։

Մկրտչյանը Կոտայքի մարզում սեփականատեր է մի շարք հողամասերի․ 0․045 հա՝ Քասախ համայնքի Զ․ Անդրանիկի փ․ 48, 0․04116 հա՝ նույն համայնքի Անդրանիկի փ․ 46, 0․02 հա՝ Անդրանիկի փ․ 44 հասցեներում և 0․40092 հա՝ Քասախ համայնքում։ Պատգամավորության թեկնածուն 0․0584 հա հողամաս ունի նաև Երևանի Դավթաշեն Հ․ Մելքումովի 52/14 հասցեում։

Որպես շարժական գույք նա հայտարարագրել է 2012 թվականի արտադրության KIA SPORTAGE 2.0 GDI Turbo ավտոմեքենա։ Ըստ հայտարարագրի՝ Մկրտչյանը չունի թանկարժեք գույք, այսինքն՝ 8 մլն դրամից ավելի արժեքով շարժական գույք։ Դատարկ է նաև եկամուտների աղյուսակը․ ստացվում է՝ նա չունի եկամտի որևէ աղբյուր։ Արժեթուղթ և այլ ներդրումներ ևս չունի։

Հայտարարագիրը ներկայացնելու օրվա դրությամբ՝ «Պատիվ ունեմ» դաշինքի պատգամավորության կին թեկնածուն ունեցել է 5․000․000 ՀՀ դրամ, 6000 ԱՄՆ դոլար և 3000 եվրո դրամական միջոցներ։

Արփի Հակոբյան