Քաղաքականություն
15.06.2021 | 23:02
Միջատլանտյան հարաբերություններն ամրապնդելու ջանքերում Մեծ յոթնյակի գագաթաժողովին հաջորդում է Բրյուսելում ՆԱՏՕ-ի անդամ երկրների ղեկավարների հանդիպումը: Այս հանդիպումը մեծապես է կարևորում Հյուսիսատլանտյան դաշինքի գլխավոր քարտուղար Յենս Ստոլթենբերգը, նրա խոսքերով՝ «Ռուսաստանի ու Չինաստանի պես ավտորիտար վարչակարգերի առկայության պայմաններում»: Այս մասին գրում է Ամերիկայի Ձայնը։
ԱՄՆ-ի նախագահ Ջո Բայդենը, ինչպես Եվրամիության գագաթաժողովի ժամանակ, այստեղ ևս փորձում է Պեկինի ու Մոսկվայի դեմ գործողություններում ստանալ գործընկերների աջակցությունը:
«Ռուսաստանն ու Չինաստանը ձգտում են սեպ խրել մեր անդրատլանտյան համերաշխության մեջ: Մենք տեսնում ենք չարամիտ կիբերակտիվության աճ: Բայց մեր դաշինքի հիմքերն ամուր են»,- ասել է նա:
Սակայն, եթե Մոսկվայի գործունեության դեմ դաշինքը կանգնած է խիստ պատասխան տալու դիրքերում, Չինաստանի հետ վարվելու հարցում նրանք ոչ միշտ են միասնական:
Սակայն Եվրոպայի առաջնորդները մեծ ոգևորությամբ են ողջունում միասնաբար գործելու ԱՄՆ-ի նախագահ Ջո Բայդենի դիրքորոշումը: Նրանք լավ են հիշում նախորդ նախագահ Թրամփի «Առաջին հերթին՝ Ամերիկան» կարգախոսը, երբ վերջինս ՆԱՏՕ-ն նույնիսկ «հնացած» կառույց էր անվանում:
Գերմանիայի կանցլեր Անգելա Մերկելն ասում է, թե նոր էջ է այսօր բացվում նախագահ Ջո Բայդենի մասնակցությամբ:
Հիշեցնենք, որ Հյուսիսատլանտյան դաշինքի երկրները հիմնել են «ՆԱՏՕ-2030» անվանումը կրող խորհրդակցական մեխանիզմ, որի նպատակն աշխարհում անկանխատեսելի սպառնալիքները և աճող համաշխարհային մրացակցությունը դիմակայելն է:
Առաջնորդները քննարկել են նաև Աֆղանստանից ԱՄՆ-ի և ՆԱՏՕ-ի զորքերը մինչև սեպտեմբերի 11-ը դուրս բերելու հարցը:
Բայդենը հանիդպել է նաև Թուրքիայի նախագահ Էրդողանին, երբ ԱՄՆ-ի ու Թուրքիայի հարաբերությունները լարված են հատկապես Թուրքիայի կողմից Ռուսաստանից S-400 մակնիշի հրթիռային պաշտպանության համակարգեր գնելու և 2020 թվականին Լեռնային Ղարաբաղում Հայաստանի դեմ պատերազմում Ադրբեջանին աջակցելու ու Սիրիայում ռազմական գործողություններ իրականացնելու պատճառով:
Եվրամիության առաջնորդների հետ հանդիպումից հետո Բայդենը մեկնելու է Ժնև` հանդիպելու համար Ռուսաստանի իր պաշտոնակցին:
