30.06.2026 | 09:48
Էնցո Մարեսկան` «Մանչեսթեր Սիթիի» գլխավոր մարզիչ
ԿԸՀ-ն անվավեր ճանաչեց պատգամավորի 7 թեկնածուի գրանցումը․ 6-ն ինքնաբացարկ էին հայտնել
Քաղաքականություն
08.06.2021 | 17:22
Կենտրոնական ընտրական հանձնաժողովն այսօր կայացած արտահերթ նիստին որոշում ընդունեց 2021թ․ հունիսի 20-ին կայանալիք խորհրդարանական արտահերթ ընտրություններին մասնակցող տարբեր քաղաքական ուժերը ներկայացնող 6 պատգամավորի թեկնածուի գրանցումը ուժը կորցրած ճանաչել:
Ինքնաբացարկի դիմում էին ներկայացրել 2021 թվականի արտահերթ խորհրդարանական ընտրություններին մասնակցող «Ազգային-ժողովրդավարական բևեռ» համահայկական կուսակցության ընտրացուցակում ընդգրկված պատգամավորի թեկնածուներ Աղունիկ Հակոբյանը, Արտյոմ Պողոսյանը, Գագիկ Տոնականյանը։
ԿԸՀ-ն ընդունեց նրանց դիմումները և գրանցումները ճանաչեց ուժը կորցրած:
Ինքնաբացարկ ներկայացրած հաջորդ թեկնածուն Հայաստանի դեմոկրատական կուսակցության ընտրական ցուցակում ընդգրկված պատգամավորի թեկնածու Միքայել Միքայելյանն էր: Ինքնաբացարկ էին հայտնել նաև «Միասնական Հայրենիք» կուսակցության ընտրացուցակում ընդգրկված պատգամավորի թեկնածուներ Շուշան Ավետիսյանն ու Արմինե Օհանյանը։
«Պատիվ ունեմ» դաշինքի ընտրական ցուցակում ընդգրկված պատգամավորի թեկնածու, ԴԱՀԿ նախկին պետ Միհրան Պողոսյանի գրանցումը ԿԸՀ-ն այսօր անվավեր ճանաչեց՝ վերջին 4 տարում Հայաստանում մշտապես չբնակվելու հիմքով: Նա չունի ընտրվելու իրավունք: Որոշմանը կողմ քվեարկեց հանձնաժողովի 7 անդամից 5-ը, դեմ՝ 2:
Լիլիթ Շաբոյան
