ՀՀԿ-ն ընտրակեղծարար իշխանություն էր․ քաղաքացին հիմար չի, գիտի՝ ով էր փող բաժանում․ Վահագն Ալեքսանյան․ ՏԵՍԱՆՅՈՒԹ

Factor TV–ն զրուցել է ԱԺ «Իմ քայլը» խմբակցության պատգամավոր Վահագն Ալեքսանյանի հետ

-Պարո՛ն Ալեքսանյան, աստիճանաբար երևում են այն բևեռները, որոնք մասնակցելու են ընտրություններին։ Ընդդիմադիր դաշտում միավորվել են ՀՀԿ-ն և Վանեցյանը։ ՀՀԿ փոխնախագահը հայտարարեց․ «Որպես հաղթանակ՝ մենք դիտարկելու ենք այս կապիտուլյանտ իշխանություններին գահընկեց անելու ընտրական գործընթացը»։ Լո՞ւրջ մրցակից է լինելու այս դաշինքը, ի՞նչ վտանգներ եք այնտեղից սպասում։

–Լուրջ մրցակից ասվածն իրականում շատ հարաբերական բան է, որովհետև այն գործունեությունը, որ իրենք ծավալում են քաղաքականության անվան տակ, մենք չենք ծավալել և չենք ծավալելու, հետևաբար՝ նրանց հետ մրցակցելու ոչ մի եզր ես ուղղակի չեմ տեսնում։ Ինչո՞վ մենք պետք է մրցակցենք ՀՀԿ-ի հետ՝ ընտրակաշառք բաժանելո՞վ, վարչական ռեսուրսի կիրառմա՞մբ, ինչո՞վ։

-Գաղափարական պայքար ձեր ուժերի միջև չի՞ կարող ծավալվել։

-ՀՀԿ-ի գաղափարական հենարանը, որպես այդպիսին, ես չեմ տեսնում։

-Նրանց գաղափարախոսության հիմքում դրված է, ինչպես իրենք են նշում՝ «նժդեհականությունը»։

–Դա այն է, ինչ հայտարարվում է, բայց թույլ տվեք ասել, որ նրանց գործունեությունն այլ է։ Հատկապես, օրինակ, Հայաստանի Ֆուտբոլի ազգային հավաքականի լոգոյի վրայից Արարատ լեռան պատկերը հանելը Թուրքիայի նախագահին ընդունելիս, կներեք, իմ պատկերացմամբ՝ դա իրենց գաղափարախոսության մեջ չի տեղավորվում։

-Բայց ձեզ՝ «Քաղաքացիական պայմանագրին» կհիշեցնեն, որ հրաժարվել եք «իզմերից»՝ ո՛չ սոցիալիստ եք, ո՛չ լիբերալ եք, ո՛չ էլ պահպանողական։ Այսինքն, այդ դեպքում՝ դուք էլ խնդիր ունեք գաղափարախոսության հետ կապված։

-Մենք խնդիր չունենք, մենք խնդիր ունենք «իզմերի» հետ կապված, դրանք տարբեր բաներ են։ Մի բան է չունենալ «իզմ», այլ բան է՝ չունենալ գաղափարախոսություն։ «Քաղաքացիական պայմանագիր» կուսակցության գաղափարախոսությունը շատ վառ և հստակ արտացոլված է կանոնադրության և ծրագրի մեջ։ Մեր պատկերացմամբ՝ 21-րդ դարի աշխարհում շատ դժվար է կոնկրետ վերցնել սոցիալիզմի «իզմը» և գնալ միանշանակ այդ ճանապարհով։ Ամբողջ աշխարհում, բոլոր այն կուսակցությունները, որ կրող են կոնկրետ «իզմի», միևնույն է՝ շեղումներ արձանագրում են այս կամ այն պահին։

-ՀՀԿ փոխնախագահը, իր խոսքով՝ թարմ փաստեր է բերել, թե ինչպես է «կապիտուլյանտ իշխանությունը պատրաստվում կեղծել ընտրությունները»։ Աշոտյանը թվարկում է՝ Փաշինյանը հրաժարականից հետո հակասահմանադրական ձևով ինքնահռչակվել է վարչապետի ԺՊ, ԸՕ-ն միահեծան եք փոփոխել, ավելին, ասում է՝ դպրոցներից և մանկապարտեզներից ահազանգեր կան, որ քննչական գործողություններ են իրականացնում տնօրենների հետ։ Ինչո՞ւ եք պատրաստվում կեղծել ընտրությունները՝ ինչպես պնդում է ՀՀԿ-ականը, չէ՞ որ այլ բան էիք խոստացել։

-Ավելի հիմար բան, քան իր ամեն ինչում կեղծ մարդուց լսել, որ մենք պատրաստվում ենք կեղծել ընտրությունները, ես կյանքումս լսած չկամ, կներեք ինձ։ Բայց պարոն Աշոտյանը՝ իր քաղաքական գոյությամբ, հենց կեղծիք է։ Դուք պատկերացնո՞ւմ եք․․․ ես սրա մասին միշտ ասել եմ և շարունակելու եմ ասել՝ պարոն Աշոտյանը ՀՀ Զինված ուժերի փոխգնդապետ է, այդ փոխգնդապետի կոչումն ինքը ստացել է՝ առանց բանակում մեկ օր ծառայելու։ Մարդու՝ բարոյականության ու կեղծավորության նկատմամբ վերաբերմունքի ցուցիչ է, ես կարծում եմ։

-Բայց հիշեցնեմ՝ 44-օրյա պատերազմի ժամանակ նա հիվանդանոցներից մեկում կամավորական էր։

-Դե՝ այնուամենայնիվ, ես, օրինակ, իմ ծառայության տարիներին ճանաչել եմ մի ավագ լեյտենանտի, որը կապիտանի կոչում չէր ստանում՝ քսան տարի ծառայելով հանդերձ։

-Դուք կարո՞ղ եք հերքել, որ դպրոցների և մանկապարտեզների տնօրենների հետ քննչական գործողություններ են իրականացվում, ինչն ասոցացվում է ընտրակեղծիքների հետ։

-Ես կարծում եմ՝ ընտրակեղծիքների ու դպրոցի ասոցացիան Արմեն Աշոտյանի ևՀՀԿ-ականների ուղեղում է շատ վառ, մենք դպրոցներն ու նախակրթարանները չենք դիտարկում որպես ընտրություններին միջամտող օղակներ։ Մենք դա դիտարկում ենք ուղղակի այն նպատակով, որով ծառայում են՝ պիտի կրթեն մեր երեխաներին։ Ու եթե պարոն Աշոտյանն այդ դպրոցներում կատարվածի շուրջ քննչական գործողությունները փորձում է կապել ընտրությունների հետ, դա բնազդաբար հիշողություն է, որ փորձում է դպրոցը կապել ընտրությունների հետ, որովհետև մենք շատ լավ հիշում ենք՝ 2017-ի ընտրությունների ժամանակ ինչ սկանդալ եղավ, երբ դպրոցի տնօրենները ՀՀԿ-ի համար ձայն էին ապահովում։ Դա իր և իր բարոյականության հարցն է։

-ՀՀԿ-ականներն իսկապե՞ս իրավունք չունեն ձեզ նման մեղադրանք ներկայացնելու։ Ըստ ձեր իշխանության՝ ՀՀԿ-ն ընտրություն չի կեղծել, քանի որ դուք երեք տարի իշխանության ղեկին եք և ՀՀԿ-ն ընտրակեղծիքներով իշխանություն գնելու համար չի կանչվել պատասխանատվության, բացի՝ զիբիլիքսի գործով նշանակված տուգանքները մի քանի հոգու։ Եթե ընտրակեղծարար էին նրանք, ապա կկանգնեին դատարանի առաջ։

-Դա իրականում շատ վատ մանիպուլյացիա է Ձեր կողմից, որովհետև մեր իշխանության համոզմամբ՝ ՀՀԿ-ն ընտրակեղծարար իշխանություն էր, բայց դա շատ բարդ ապացուցման գործողություն է, բայց ինձ թվում է՝ մեզ նայող քաղաքացիները լուսնից չեն իջել վստահաբար, ամեն անգամ՝ 4 կամ 5 տարին մեկ ընտրությունների ժամանակ շատ լավ տեսել են, թե իրենց շենքում ով է փող բաժանում, ով է մեքենայով ընտրողներին տանում ընտրատեղամասեր։ Հիմարի տեղ են փորձում դնել մարդկանց, ու իրենց թվում է՝ դա շատ լավ աշխատելու է, ՀՀ քաղաքացին հիմար չի։

Հարցազրույցն ամբողջությամբ՝ տեսանյութում։

Ռոբերտ Անանյան