Բաքվում Գերմանիայի դեսպանը պարզաբանել է՝ ինչու է հրաժարվել այցելել Արցախի գրավյալ տարածքներ

Վերջին օրերին ադրբեջանական լրատվամիջոցները համագերմանական արշավ են սկսել Բունդեսթագի պատգամավորների՝ Ադրբեջանի հետ կապված կոռուպցիոն բացահայտումների ֆոնին։

Ադրբեջանական մամուլի հիմնական թիրախում հայտնվել է այդ երկրում Գերմանայի դեսպան Վոլֆգանգ Մանինգը, քանի որ, ըստ տարբեր հրապարակումների, նա հրաժարվել է այցելել Արցախի գրավյալ տարածքներ։ «Թուրան»-ը խնդրել է Գերմանիայի դեսպանին՝ մեկնաբանել կատարվածը, ինչպես նաև նշել՝ ինչու չի մասնակցել դիվանագետների այցերին և ինչպիսի՞ն է ներկայում Գերմանիայի դիրքորոշումը Լեռնային Ղարաբաղի հակամարտության շուրջ։

Առաջին հարցին դեսպանը պատասխանել է այսպես․ «Բոլոր գործոնների վերլուծությունից է կախված որոշումը՝ դեսպանը կամ դեսպանության աշխատակիցները երբ և ուր գնան։ Որոշիչ է այն հարցը՝ արդյո՞ք այն կուժեղացնի դեսպանության առաքելությունը, որը պահանջում է Գերմանիայի ԱԳ նախարարությունը, և արդյո՞ք ուղևորությունը վտանգներ պարունակում է անվտանգության ու առողջության համար»։

Ինչ վերաբերում է ԼՂ հակամարտության շուրջ Գերմանիայի դիրքորոշմանը, դեսպանը նշել է․ «Վերջին ամիսներին Դաշնային կառավարության քաղաքականությունը Հարավային Կովկասի նկատմամբ կենտրոնացած էր՝ դադարեցնելու ԼՂ-ի շուրջ Ադրբեջանի ու Հայաստանի միջև կոնֆլիկտի սրումը։ Կառավարության գործունեության նպատակն է՝ վերջ տալ ռազմական գործողություններին ու սկսել հաշտեցումը հայերի ու ադրբեջանցիների միջև։ ԱԳ դաշնային նախարարն ընդգծել է իր անձնական մասնակցությունը բանակցություններում իր գործընկերների հետ՝ ինչպես Ադրբեջանում, այնպես էլ Հայաստանում։ Դեսպանությունները Բաքվում ու Երևանում աշխատում են այդ ուղղությամբ։ Դաշնային կառավարությունը շարունակում է երկխոսությունն այդ հարցով Ադրբեջանի ու Հայաստանի միջև, այդ թվում՝ ԵԱՀԿ-ի ու ԵՄ-ի շրջանակում։ Մենք կոչ ենք անում երկու կողմերին վերսկսել բանակցությունները ԵԱՀԿ Մինսկի խմբի համանախագահների հովանու ներքո՝ հակամարտության կայուն կարգավորման համար»։

Էմմա Չոբանյան