02.08.2026 | 19:28
Ձևավորվել է իններորդ գումարման ԱԺ հաշվիչ հանձնախումբը․ ո՞վ կնախագահի այն
ԼՂ կարգավորմանը Անկարայի ներգրավվածության հարց քննարկվե՞լ է, թե՞ ոչ․ Էրդողանի ու Պեսկովի հայտարարությունները հակասում են
Քաղաքականություն
28.10.2020 | 16:16
ՌԴ նախագահ Վլադիմիր Պուտինը, ինչպես տեղեկացրել էինք, երեկ հեռախոսազրույց է ունեցել Թուրքիայի նախագահ Ռեջեփ Թայիփ Էրդողանի հետ։ Կողմերը քննարկել են Լեռնային Ղարաբաղի իրադարձություններն ու հակամարտության կարգավորման հարցը։
Հանդիպմանը քննարկված հարցերի վերաբերյալ թուրքական և ռուսական կողմերի մեկնաբանություններում, սակայն, որոշակի անհամապատասխանություն կա։
Մասնավորապես, Թուրքիայի նախագահը հայտարարել է, որ ռուսաստանցի պաշտոնակցին առաջարկել է միասին կարգավորել ղարաբաղյան հակամարտությունը։
«Մենք Պուտինի հետ քննարկել ենք Ղարաբաղում իրադարձությունները։ Մենք ասացինք՝ եկեք Կովկաս, լուծենք այս հարցը։ Եթե ցանկանում եք, եկեք միասին լուծենք։ Դուք խոսեք ձեր գործընկերների հետ, մենք՝ մեր։ Թող մեր երկրների ԱԳՆ ղեկավարներն ու մյուսներն էլ խոսեն։ Կարևորը հասկանանք՝ կլուծե՞նք մենք այս հարցը, թե՞ ոչ։ Եկեք արդեն ավարտենք սա։ Մենք արդար ենք։ Եվ հավատում ենք, որ դուք էլ եք անկեղծ»,- Թուրքիայի խորհրդարանում ունեցած ելույթում ասել է Էրդողանը։
Մինչդեռ Կրեմլի խոսնակ Դմիտրի Պեսկովը լրագրողների հետ զրույցում վստահեցրել է, որ Լեռնային Ղարաբաղում հակամարտության կարգավորման շուրջ բանակցություններին Թուրքիայի մասնակցության հարց Պուտինի հետ հեռախոսազրույցում չի քննարկվել։ «Միայն հակամարտող կողմերը կարող են համաձայնություն տալ այս կամ այն պետության մասնակցությանը բանակցություններին»,- հավելել է Պեսկովը։
