ԱԳՆ-ն փորձել է հերքել Ազնավուրի ասածը, բայց չի՞ կարողացել․ աշխատանքային փաստաթուղթը հայտնվել է մամուլում

Այսօր կեսօրին մամուլում ԱԳՆ անունից հրապարակվեց ուշագրավ մի հայտարարություն, որտեղ հերքվում էին Շառլ Ազնավուրի՝ նախօրեին ֆրանսիական պարբերականի հետ զրույցում արված հայտարարությունները՝ դրանք վերագրելով սխալ թարգմանությանն ու կոնտեքստից կտրելուն:

Հայաստանի արտաքին գործերի նախարարության լրատվական ծառայության անունից տարածված այդ հայտարարությունում, մասնավորապես ասված էր, որ հայկական մամուլում ներկայացված «Միլիոններ են գողանում, մնում են անպատիժ» հոդվածում, որտեղ ներկայացվում էր հանրաճանաչ շանսոնյե Շառլ Ազնավուրի ՝ «Nouvelle d’Armenie» պարբերականի համար Հայաստանի իշխանությունների մասին արված արտահայտությունը, թե «ձու գողացողին բանտարկում են, իսկ միլիոններ գողացողին թողնում են անպատիժ», «ներկայացված են փոփոխված փաստեր»։

«Ռադիոկայանի կողմից հարցազրույցի մեկնաբանությունը ընդհանուր առմամբ ներկայացված է հատված-հատված, կոնտեքստից կտրված մեջբերումներով և ընթերցողի մոտ կարող է բացասական տպավորություն ստեղծել, մինչդեռ բնօրինակում Շառլ Ազնավուրը բավական դրական երանգներով է ներկայացնում իրականությունը: Բացի այդ, «Ազատություն ռադիոկայանի» այն անդրադարձը, թե իբր աշխարհահռչակ շանսոնյեի խոսքով, ինքն այս թեմայի շուրջ խոսել է Հայաստանի ղեկավարների հետ․ – «Ես նրանց չեմ խնայում: Ասում եմ այն, ինչ որ մտածում եմ», ևս անճշտություններ ունի, քանի որ Ազնավուրը նշել է հետևյալը՝ «Ես դա ասել եմ հայերին» (Je le dis aux Arméniens)»,- ասված էր ԱԳՆ լրատվական ծառայության անունից հրապարակված տեքստում։

Քիչ անց, սակայն, այդ հրապարակումների մեծ մասը ջնջվեց որոշ կայքերից, իսկ որոշ կայքեր էլ հետգրությամբ հայտնեցին, որ ԱԳՆ-ն նման հայտարարություն չի տարածել, և կատարվածը եղել է թյուրիմացություն:

Factor.am -ի հարցմանն ի պատասխան, ԱԳՆ խոսնակ Տիգրան Բալայանը վերստին հայտնեց, որ ԱԳՆ-ն նման հայտարարություն չի տարածել, սակայն չցանկացավ մանրամասներ հայտնել, թե ով կարող էր հանդես գալ ՀՀ ԱԳՆ անունից։

Մեր աղբյուրները, սակայն, հայտնեցին, որ ԱԳՆ-ն պատրաստվում էր հերքում հրապարակել Ազնավուրի հայտարարությունները ներկայացրած հոդվածի կապակցությամբ, և հենց այդ հերքման սևագիր, չստուգված տարբեարկն էլ հայտնվել է մամուլում։

Փորձեցինք այս հարցի շուրջ խոսնակից պարզաբանում ստանալ։ Հարցին՝ մենք ունենք տեղեկություն, որ հրապարակված փաստաթուղթը ԱԳ նախարարության աշխատանքային փաստաթղթերից է եղել, որը անհասկանալի արտահոսքի արդյունքում հայտնվել է մամուլում, արդյո՞ք դա ճիշտ է, ի՞նչ եք պատրաստվում ձեռնարկել, արդյո՞ք մտահոգիչ չէ, որ ԱԳ անունից կարող են տարբեր հայտարարություններ արվել, Տիգրան Բալայանը պատասխանեց․ «Կրկնում եմ, մենք նման արձագանք չենք հրապարակել։ Մեզ համար պարզ է, թե ինչ է եղել․ անփութություն։ Իսկ ԱԳՆ անունից միայն ԱԳՆ կարող է խոսել»։

Սյուզան Սիմոնյան