27.10.2026 | 00:08
Վարդան Մինասյանն աշխատանքի է անցել Լիբանանում
53-ամյա կալանավորի դին հայտնաբերվել է կախված վիճակում
Հասարակություն
17.03.2026 | 15:40
Տարեսկզբից մահվան երկրորդ դեպքն է գրանցվել կալանավայրում։ Տեղեկությունը Factor TV-ի հետ զրույցում հաստատեցին Քրեակատարողական ծառայությունից. «Մարտի 17-ին՝ ժամը 11։00-ի սահմաններում, ՀՀ արդարադատության նախարարության «Արմավիր» քրեակատարողական հիմնարկի կարանտինային խցում հայտնաբերվել է ս.թ. մարտի 13-ին կալանավորված, 1973թ․ ծնված անձը՝ կախված վիճակում»։
Shamshyan.com-ը գրել էր, որ այս իրավիճակը լարված դրություն է առաջացրել հիմնարկում, ինչի պատճառով զանգվածային հացադուլ է սկսվել։ ՔԿԾ հասարակայնության և լրատվության վարչության պետ Նոնա Նավիկյանը հերքեց այս տեղեկությունը. ««Արմավիր» քրեակատարողական հիմնարկում այս պահի դրությամբ հացադուլի մեջ է գտնվում 3 անձ, որոնք հացադուլ հայտարարել են մարտի 16-ից։ Նրանցից երկուսի հացադուլը պայմանավորված է իրենց առաջադրված մեղադրանքներով, իսկ մեկինը՝ առողջական խնդիրներով։ Վերոնշյալ դեպքերը որևէ առնչություն չունեն արձանագրված մահվան դեպքի հետ»։
Հիշեցնենք՝ առաջին դեպքը ևս առնչվում էր «Արմավիր» ՔԿՀ-ին։ Փետրվարի 23-ին հայտնի դարձավ, որ «Արմավիր» քրեակատարողական հիմնարկից հիվանդանոց տեղափոխված 44-ամյա Տավրոս Ոսկանյանը մահացել է.
«Արմավիր» քրեակատարողական հիմնարկում պահվող, 1982թ․ ծնված կալանավորված անձի ինքնազգացողության վատթարացման պատճառով 29․01․2026թ․ կանչվել է շտապօգնություն, որը վերջինիս տեղափոխել է քաղաքացիական բժշկական կենտրոն։ 04․02․2026թ․ կալանավորված անձը տեղափոխվել է պալիատիվ բուժօգնության կենտրոն։ 17․02․2026թ․ կենտրոնում գրանցվել է կալանավորված անձի կենսաբանական մահը։
ՔԿՀ-ներում դիտորդական առաքելություն իրականացնող խումբը Factor TV-ին հայտնել էր, որ կալանավորն առողջական լուրջ խնդիրներ է ունեցել, ինչի մասին ավելի քան մեկ տարի է՝ բարձրաձայնում էին։ Բողոքելով իր առողջական վիճակի մասին ահազանգերին ընթացք չտալու դեմ՝ Ոսկանյանը մի քանի անգամ հացադուլ էր հայտարարել և օտար մարմիններ կուլ տվել: Դրանցից մի քանիսը չէին հեռացվել օրգանիզմից։
Ավելի ուշ Factor TV-ի հետ զրույցում ուշագրավ մանրամասներ էր հայտնել ԱՆ «Քրեակատարողական բժշկության կենտրոն» ՊՈԱԿ ղեկավար Կամո Մանուկյանը։ Պարզվում է՝ կալանավորն ունեցել է կալանքի հետ անհամատեղելի հիվանդություն, սակայն բյուրոկրատական քաշքշուկի պատճառով նրա խափանման միջոցը ժամանակին չէր փոխել։
Ռոզա Վարդանյան
