ԵՐԵՎԱՆԻ ԺԱՄԱՆԱԿՈՎ. Ադրբեջանում ուղեղների լվացում է, իսկ մեզ մոտ կա իրավիճակի իրական ընկալում. Աղասի Թադևոսյան. ՏԵՍԱՆՅՈՒԹ

«Այսօր իշխանությունը իր ողջ ուժերի լարմամբ հասարակության հետ կոնսոլիդացված լուծում է խնդիրներ, որոնց նախորդ ավելի քան քսան տարում վաղուց պետք է նախապատրաստված լինեինք։ Կոնսոլիդացիան նկատելի է և՛ անհատական, և՛ պետական մակարդակում։ Եթե վերջին քսան տարիներին իշխանությունները չյուրացնեին պետական գումարները, տարբեր տեսակի կոռուպցիոն գործարքներ չկնքեին, մենք այսօր կարող էինք ունենալ բավականաչափ պատրաստված պետություն»,-Factor.am-ի հետ զրույցում նման տեսակետ է հայտնում մշակութային մարդաբան, ազգագրագետ Աղասի Թադևոսյանը։

Նա անդրադառնում է նաև տեղեկատվական դաշտում Հայաստանի և Ադրբեջանի որդեգրած քաղաքականությունների առանցքային տարբերություններին։ Աղասի Թադևոսյանի համոզմամբ՝ մեր իշխանությունների՝ սոցցանցերի հասանելիությունը պահելու դիրքորոշումն ավելի ընդունելի է, քան հասարակությանը սոցցանցերում ներկայանալուց զրկելու ադրբեջանական մոտեցումը․ «Հայաստանում պահպանվում է մարդու խոսքի ազատության և իրազեկված լինելու իրավունքը։ Իսկ պատերազմական իրավիճակում դրա ապահովումը մեծ համարձակություն է մեր իշխանության կողմից։ Ադրբեջանում սոցցանցերի օգտատերերը կառավարվում են մի տեղից, իսկ մեզ մոտ կա ադեկվատություն, իրավիճակի թեկուզ պաթետիկացված, բայց իրական ընկալում, մեզ մոտ կա սառը դատող մասսա, իսկ Ադրբեջանում ուղեղներ լվալու պրոցես է ընթանում։ Սա ժողովրդավարական և բռնապետական երկրի տարբերությունն է»։

Մարդաբանի համոզմամբ՝ ադրբեջանցիների շրջանում գերիշխում է ագրեսիվ հռետորաբանությունը, մարտնչող ատելության խոսքը, իսկ մեր հասարակության շրջանում՝ խաղաղության ձգտող մարդկանց բողոքի ձայնը։

Աննա Բաբաջանյան