Լրագրողները պետք է պաշտպանված լինեն ցանկացած տեսակի անհարկի միջամտությունից կամ ճնշումից. ՄԻՊ-ը՝ ԱԺ-ում միջադեպի մասին

Մարդու իրավունքների պաշտպանն անդրադարձել է ԱԺ-ում տեղի ունեցած միջադեպին՝ նշելով, որ իրավասու մարմինները պետք է պատշաճ քննարկման առարկա դարձնեն ցանկացած դեպք, որը կարող է վկայել լրագրողի մասնագիտական գործունեությանը խոչընդոտելու կամ խոսքի ազատության անհարկի ու ոչ իրավաչափ սահմանափակման մասին։

«Մարդու իրավունքների պաշտպանի աշխատակազմում սոցիալական ցանցերի և զանգվածային լրատվության միջոցների հրապարակումների մշտադիտարկման արդյունքում արձանագրվել է Ազգային ժողովում լրագրողների հետ տեղի ունեցած միջադեպը:

Պաշտպանը հարկ է համարում ընդգծել, որ լրագրողները, իրենց մասնագիտական գործունեությունն իրականացնելիս, պետք է պաշտպանված լինեն ցանկացած տեսակի անհարկի միջամտությունից կամ ճնշումից: Խորհրդարանում լրագրողների գործունեության համար սահմանված կանոնները չպետք է վերածվեն նրանց իրավունքների սահմանափակման կամ մասնագիտական գործունեության անհարկի միջամտության միջոցի:

Մարդու իրավունքների պաշտպան Անահիտ Մանասյանը կարևորում է պետության կողմից բնականոն և անխոչընդոտ լրատվական գործունեության ապահովումը: Իրավասու մարմինները պետք է պատշաճ քննարկման առարկա դարձնեն ցանկացած դեպք, որը կարող է վկայել լրագրողի մասնագիտական գործունեությանը խոչընդոտելու կամ խոսքի ազատության անհարկի ու ոչ իրավաչափ սահմանափակման մասին:

Պաշտպանի հանձնարարությամբ մանրամասն ուսումնասիրվում են միջադեպի վերաբերյալ հրապարակային նյութերը և իր լիազորությունների շրջանակում կձեռնարկվեն անհրաժեշտ քայլեր»,- ասված է հայտարարության մեջ:

Հիշեցնենք՝ այսօր ԱԺ-ի՝ լրագրողների համար նախատեսված օթյակում ակցիա իրականացնող լրագրողներին ՊՊԾ աշխատակիցները քաշքշելով դուրս են հանել։ Լրագրողները ՔՊ-ական պատգամավոր Անդրանիկ Քոչարյանի՝ լրագրող Հռիփսիմե Ջեբեջյանին ուղղված անհարգալից արտահայտությունների դեմ բողոքի պաստառներ են պարզել՝ «Ասա՛ կներես», «Անդրանիկ Քոչարյան, շուրթերդ մաքրի՛ր» գրություններով։ ՊՊԾ աշխատակիցները լրագրողներից խլել են այդ պաստառները։