12.03.2026 | 23:35
Վթար Երասխ-Երևան ավտոճանապարհին․ կան տուժածներ
Լարված իրավիճակ 31/69 ընտրատեղամասում. արդեն 1,5 ժամ է` քվեատուփը չի բացվել
Քաղաքականություն
30.03.2025 | 21:38
Արդեն շուրջ 1,5 ժամ է իրարանցում է Գյումրիի 31/69 ընտրատեղամասում։ Մինչ որոշ ընտրատեղամասերում արդեն հաշվարկն ավարտվում է, այստեղ մեկ ու կես ժամ է քվեատուփը չի բացվում։
Քվեարկության ավարտից հետո պարզվեց, որ 711 մատնահետք կա, բայց 709 ստորագրություն։ Ավագանու անդամի թեկնածուներից Վարդան Ղուկասյանի թիմակիցը հայտարարեց, թե սա նշանակում է, որ երկու քաղաքացի քվեաթերթիկ է ստացել առանց ստորագրության և առաջարկեց արձանագրել։ Հանձնաժողովի նախագահը Factor.am-ի հարցին ի պատասխան ասաց, որ դա իր արձանագրելունը չի։
Այս քննարկումների ֆոնին Մայր Հայաստան դաշինքի վստահված անձը հաստատեց, թե ամբողջ օրը ճնշում է եղել հանձնաժողովի վրա։ Ըստ նրան` հարևանությամբ գտնվող Սարիկ Մինասյանի շտաբից տարբեր մարդկանց են ուղղորդել քվեարկության։ Ընտրատեղամասում գտնվող Սարիկ Մինասյանի թիմակիցն էլ Factor TV-ի հարցին ի պատասխան ասաց, որ որևէ մեկին չեմ ուղղորդել, իսկ շտաբը, ըստ նրա, ընտրությունից մեկ օր առաջ փակվել է։
Նշենք, որ այսօր լրագրողներին հաջողվել է մտնել տարածք և տեսնել, որ այնտեղ Սարիկ Մինասյանի քարոզչական պաստառներն են։ Ավելի ուշ դրանք հեռացրել են։
Նարեկ Կիրակոսյան
