Մարդու իրավունքների, քաղաքացու պաշտպանվածության հետ կապված հարցեր կան․ Էդգար Խաչատրյանը՝ աշխարհազորի օրինագծի մասին. ՏԵՍԱՆՅՈՒԹ

Ինձ համար հասկանալի է հիմնավորումը աշխարհազորի ստեղծման անհրաժեշտության վերաբերյալ, հասկանալի է՝ ինչ խնդիր ենք ուզում լուծել, բայց կառույցի ստեղծումը խնդրահարույց է. ինչ ճանապարհով պետք է այն ստեղծվի, սա քննարկման հարց է: «Հայկական աշխարհազոր. պաշտպանություն, անվտանգություն և մարդու իրավունքներ» թեմայով քննարկման ժամանակ այս մասին ասաց «Խաղաղության երկխոսություն» ՀԿ տնօրեն Էդգար Խաչատրյանը:

«Եթե դիտարկում ենք մարդու իրավունքների, ժողովրդավարության տեսակյունից, մենք ստեղծում ենք իրավական պետություն, և շեշտադրումը դնել միայն անվտանգային հարցերի վրա, ինձ համար անհասկանալի է, չի կարելի արհեստականորեն տարանջատել մարդու իրավունքները և անվտանգության հարցերը: Սա «Ազգ-բանակ» մոտեցման տրամաբանությամբ է, որը, որպես հայեցակարգ, մեր հասարակությանը տանում է ռազմականացման»,- հավելեց փորձագետը։

Նա նաև կարծիք հայտնեց, որ պաշտպանության ոլորտը, օրենքի այս նոր նախագծով նախատեսված ենթակառուցվածքներով, դուրս է մնում ժողովրդավարական և պառլամենտական վերահսկողությունից, և առաջին խնդիրը հենց դա է:

«Սա հնարավորություն է ստեղծում զենքի անօրինական վաճառքով զբաղվել. ի՞նչ ինստիտուտներ ունենք, որոնք կկանխեն նման երևույթները: Պաշտպանական ոլորտը պետք է լինի վերահսկելի, թափանցիկ, որպես ինստիտուտ, նրա կառավարումը և վարչարարությունը պետք է հասկանալի լինի հասարակության համար, իսկ աշխարհազորի մեխանիզմը մեզ շեղում է այդ հարթությունից»,- նշեց Էդգար Խաչատրյանը:

Մանրամասները՝ տեսանյութում: