18.11.2024 | 10:22
Մի շարք բարձրաստիճան պաշտոնյաների խնդրել եմ թողնել իրենց զբաղեցրած պաշտոնները․ Փաշինյան
Նաիրա Զոհրաբյանին զանգահարած քննիչը չի մեկնաբանում, թե պատգամավորի հետ ինչ է խոսել
Հասարակություն
16.06.2020 | 11:03
ԱԺ «Բարգավաճ Հայաստան» կուսակցության պատգամավոր Նաիրա Զոհրաբյանը քիչ առաջ հայտարարեց, որ վաղ առավոտյան իրեն ՔԿ-ից քննիչ է զանգահարել, ասել, որ իր աշխատասենյակը խուզարկելու որոշում ունեն և եթե դուռը չբացվի, ապա իրենք ստիպված կլինեն այն ջարդել։
Ավելի ուշ՝ պատգամավորը հայտնեց, որ Քննչական կոմիտեի ներկայացուցիչները պատրաստվում են խուզարկություն իրականացնել ոչ թե իր՝ ԱԺ աշխատասենյակում, այլ Հանրապետության 47 հասցեում տեղակայված ԲՀԿ կենտրոնական գրասենյակի աշխատասենյակում։
Նաիրա Զորաբյանը նաև հրապարակեց այն քննիչի հեռախոսահամարը, ով իրեն զանգահարել է։
Factor.am-ը կապ հաստատեց քննիչի հետ՝ պարզելու, թե արդյոք իրականում նման հեռախոսազանգ է եղել, արդյոք իրենք Զոհրաբյանի ԱԺ աշխատասենյակը խուզարկելու որոշում են ունեցել և ասել, որ դուռը կջարդեն, եթե նա ԱԺ չգնա։ Քննիչը, սակայն, հրաժարվեց մեր հարցերին պատասխանել՝ հորդորելով կապ հաստատել ՔԿ մամուլի բաժնի հետ և այնտեղից ճշտել տեղեկությունը։
Մեր հարցին, թե արդյոք առկա է Նաիրա Զոհրաբյանի հետ հեռախոսազրույցի ձայնագրությունը, քննիչը պատասխանեց՝ ոչ։
Նաիրա Զոհրաբյանի հայտարարության առնչությամբ մեկնաբանություն համար կապ հաստատեցինք ՔԿ խոսնակ Ռիմա Եգանյանի հետ։ Նա մեզ փոխանցեց․ «Քրեական գործը, որի շրջանակներում կատարվում են քննչական գործողությունները, գտնվում է ՀՀ ազգային անվտանգության ծառայության վարույթում: Հետևաբար, ցանկացած տեղեկատվություն կարող եք ստանալ վարույթն իրականացնող մարմնից։ ՀՀ գլխավոր դատախազի ցուցումով ստեղծվել է քննչական խումբ, որում ընդգրկված են նաև ՀՀ քննչական կոմիտեի քննիչները»։
Նելլի Մելքոնյան
