20.01.2026 | 11:20
Արմեն Ռուստամյանի ճեպազրույցը՝ ՈՒՂԻՂ
Ուկրաինայի նախագահի կինը վարակվել է կորոնավիրուսով․ Զելենսկու թեստի պատասխանը բացասական է
Քաղաքականություն
12.06.2020 | 17:50
Ուկրաինայի նախագահ Վլադիմիր Զելենսկու կինը՝ Ելենա Զելենսկայան, վարակվել է կորոնավիրուսով։ Այս մասին հաղորդում է 112.ua-ն՝ վկայակոչելով նախագահի աշխատակազմի մամուլի ծառայության հաղորդագրությունը։
Նշվում է, որ առաջին տիկինը լավ է զգում, հիվանդության որևէ ախտանշան չունի։ Ելենա Զելենսկայան ամբուլատոր բուժում է ստանում, նա մեկուսացված է ընտանիքի մյուս անդամներից։
Նախագահ Վլադիմիր Զելենսկին և երեխաները նույնպես թեստավորվել են, արդյունքները բացասական են։
Նախագահի աշխատակազմից հայտնել են նաև, որ աշխատանքային հանդիպումների ժամանակ և կենցաղում առաջին տիկինը մշտապես հետևել է կարանտինային կանոններին և կանոնավորապես COVID-19-ի թեստ հանձնել։ Նախորդ՝ հունիսի սկզբին հանձնած թեստի արդյունքը բացասական է եղել։
Առայժմ հայտնի չէ՝ երբ և որտեղ կարող էր վարակվել Ուկրաինայի առաջին տիկինը։ Ներկայում համաճարակային հետաքննություն է անցկացվում։ Միաժամանակ, Զելենսկայայի հետ շփում ունեցած բոլոր անձանց տեղեկացվել է վարակվելու պոտենցիալ վտանգի մասին, նրանց խորհուրդ է տրվել ինքնամեկուսանալ, հնարավորության դեպքում՝ նաև թեստավորվել։
