19.12.2025 | 03:00
Կոնֆերենցիաների լիգա. «Նոայի» հավանական մրցակիցները փլեյ-օֆֆում
ԱԱԾ տնօրենի ու ոստիկանապետի պաշտոնանկության պատճառը Արտակ Դավթյանի որդու հարսանիքին մասնակցությունն է
Քաղաքականություն
08.06.2020 | 18:07
Factor.am-ը դեռ երեկ գրել էր, որ ՀՀ ԶՈՒ ԳՇ պետ Արտակ Դավթյանի որդու հարսանիքին մասնակցել են բարձրաստիճան սպաներ։ Եվ ահա՝ այսօր հայտնի դարձավ, որ արտակարգ դրության պայմաններում որդու հարսանիքը կազմակերպելու պատճառով պաշտոնից ազատման դիմում է գրել Արտակ Դավթյանը, իսկ քիչ անց պարզ դարձավ, որ պաշտոններին հրաժեշտ են տալիս նաև ոստիկանապետ Արման Սարգսյանը և ԱԱԾ տնօրեն Էդուարդ Մարտիրոսյանը։
Մինչ կփորձեինք վարչապետի խոսնակից ճշտել մեր տեղեկությունները, որ այս բարձրաստիճան պաշտոնյաների աշխատանքից ազատումը ևս պայմանավորված է այդ հարսանիքին մասնակցությամբ, ՀՀ վարչապետ Նիկոլ Փաշինյանն, ըստ էության, այդ փաստը հաստատեց պարետատան նիստում։
Վարչապետը, դիմելով ոստիկանապետին և ԱԱԾ տնօրենին, նախ խոսեց հակահամաճարակային կանոնների մասին` ընդգծելով, որ պաշտոնյաները սեփական վարքագծով պետք է լինեն օրինակ, ապա ասաց, որ չի կարող այնպես լինել, որ բարձրաստիճան պաշտոնյաները վարչապետի ուղերձներին հակասող քայլեր անեն եւ դա մնա անհետեւանք․ «Բարձրաստիճան պաշտոնյաների գործողությունները չեն կարող հակասել վարչապետի ուղերձներին, չի կարող լինել նման իրավիճակ»,- նշեց Փաշինյանը։
