20.01.2026 | 10:11
NYMEX. Թանկարժեք մետաղների գներն աճել են
Հունաստանում չեն բացառել Թուրքիայի հետ ռազմական կոնֆլիկտի հնարավորությունը
Քաղաքականություն
05.06.2020 | 17:30
Հունաստանի ազգային պաշտպանության նախարար Նիկոլ Պանայոտոպուլոսը հայտարարել է, որ ինքնիշխան իրավունքները պաշտպանելու համար Աթենքը պատրաստ է ամեն ինչի, այդ թվում՝ Անկարայի դեմ ռազմական գործողությունների։
«Վերջին շրջանում Թուրքիայի պահվածքը բավական ագրեսիվ է։ Ես կարծում եմ, որ Հունաստանի համար նման պահվածքին դիմակայելու միակ միջոցը, որն ընդհանուր առմամբ ագրեսիայի միտում ունի, մի կողմից իր ամբողջ դիվանագիտական զինանոցն օգտագործելն է, մյուս կողմից՝ ապահովել ԶՈՒ-ի զսպման ուժի ընդլայնումը»,- Star հեռուստաալիքին տված հարցազրույցում ասել է նախարարը, գրում է ՌԻԱ Նովոստին։
Հստակեցնող հարցին՝ պատրա՞ստ է Հունաստանը կոնֆլիկտի ռազմական լուծմանը, ինչպես հայտարարել է վարչապետի խորհրդականը, Պանայոտոպուլոսը պատասխանել է․ «Ճիշտ այդպես»։
«Նա ասել է, որ մենք պատրաստվում ենք ցանկացած իրավիճակի։ Իհարկե, ամեն հնարավորը ներառում է նաև ռազմականը։ Մենք չենք ցանկանում դա, բայց ուզում ենք հասկացնել, որ կանենք հնարավոր ամեն ինչ, որպեսզի առավելագույնս պաշտպանենք մեր ինքնիշխան իրավունքները»,- հավելել է նախարարը։
Նշենք, որ մի քանի օր առաջ Թուրքիայի կառավարական պարբերականում հունական կղզիների մերձակայքում ածխաջրածինների պաշարների հետազոտության և արդյունահանման համար լիցենցիա ստանալու հայտեր են հրապարակվել։
Երկուշաբթի Հունաստանի ԱԳ նախարար Նիկոս Դենդիասը հայտարարել է, որ Թուրքիան փորձում է յուրացնել այլ երկրի ինքնիշխան իրավունքները, իսկ տեղի ունեցածը սադրանք է որակել։ Ավելի ուշ երկրի վարչապետ Կիրիակոս Միցոտակիսն էլ ԵՄ ղեկավարությանը «թուրքական սադրանքների» հետ կապված նամակ է ուղղել։
Միաժամանակ, Հունաստանը հայտարարել է, որ Թուրքիայի կողմից հնարավոր էսկալացիան կհանգեցնի ոչ թե հույն-թուրքական, այլ թուրք-եվրոպական ճգնաժամի։
