Ո՞ր երկրներում է արտակարգ դրությունն ազդել խոսքի ազատության վրա. առանց մեկնաբանության. ՏԵՍԱՆՅՈՒԹ

Բազմաթիվ երկրներում, որտեղ կորոնավիրուսի լուրջ տարածվածություն կա, արտակարգ դրության պայմաններում գրաքննություն սահմանված չէ:

Իտալիան, որը վարակի տարածվածությամբ 2-րդ տեղում է՝ 27.980 դեպքով և 2.158 մահվան ելքով, արտակարգ դրություն է հայտարարել՝ առանց որևէ գրաքննության: Իսպանիան, որը վարակի տարածվածությամբ 4-րդն է՝ 11.309 դեպքով և 509 մահվան ելքով, այս օրերին գրաքննություն չի սահմանել:

Առանց որևէ գրաքննության արտակարգ դրություն է հայտարարվել նաև ԱՄՆ-ում, որտեղ վարակակիրների թիվը 5.204 է, իսկ մահվան ելքերինը՝ 92:

Կորոնավիրուսի մասին հրապարակումների գրաքննություն սահմանված չէ նաև Ղազախստանում, Բուլղարիայում, Հունգարիայում, Չեխիայում, Սլովակիայում, Սերբիայում ու Մակեդոնիայում: Պորտուգալիայում, որտեղ 448 վարակակիր կա և մահվան 1 դեպք, արտակարգ դրության ժամանակ խոսքի ազատության սահմանափակումն անթույլատրելի է համարվում: Այս օրերին գրաքննություն չկա նաև Նիդերլանդներում, որտեղ կորոնավիրուսի դեպքերը 1708-ն են, իսկ մահվան ելքերը՝ 43:

Մի շարք երկրներում, սակայն, արտակարգ դրությունը խոսքի ազատության սահմանափակումներ է մտցրել: Չինաստանը, որը վարակի տարածվածությամբ առաջինն է՝ 81.058 հաստատված դեպքով և 3.230 մահվան ելքով, կորոնավիրուսի վերաբերյալ գրաքննություն է սահմանել: Չինաստանում խստորեն հսկվում են կորոնավիրուսի վերաբերյալ սոցցանցերում գրառումները, ԶԼՄ-ներում հրապարակումները և հեշթեգերը:

Վարակի տարածվածությամբ 3-րդ երկիրը՝ Իրանը, որտեղ 16.169 դեպք և 988 մահ է գրանցվել, պատիժ է սահմանել կորոնավիրուսի վերաբերյալ խուճապ առաջացնող տեղեկություն տարածելու համար: Այս առիթով Իրանում արդեն մի քանի պաշտոնյա է ձերբակալվել, մի քանիսի դեմ էլ քրեական գործ է հարուցվել:

Արտակարգ դրության պայմաներում գրաքննություն կա Ռումինիայում, որտեղ վարակակիրները 131-ն են, իսկ մահվան դեպքերը՝ 0, և Հոնդուրասում, որտեղ կորոնավիրուսի 2 դեպք կա:

Հայաստանում արտակարգ դրությունը որոշակիորեն սահմանափակել է խոսքի ազատությունը, ինչը հարուցել է շատերի դժգոհությունը: Լրատվական համայնքի ու լրագրողական կազմակերպությունների դժգոհությունից հետո, «Արտակարգ դրություն հայտարարելու մասին» որոշման մեջ Կառավարությունը փոփոխություններ է մտցրել: Փոփոխությունները, սակայն, վերաբերում են միայն արտաքին պաշտոնական աղյուրներին (պետությունների ղեկավարներ, պետական մարմիններ) հղումներ տալուն:

Մանրամասները՝ տեսանյութում:

Նելլի Մելքոնյան